અમેરિકામાં શટડાઉન શરૂ: ટ્રમ્પના સલાહકારોની ચેતવણી, દર અઠવાડિયે GDPને $૧૫ અબજનું નુકસાન થશે

અમેરિકામાં સરકારી કામકાજનું શટડાઉન શરૂ થઈ ગયું છે, જેનાથી દેશના અર્થતંત્ર પર ગંભીર અસર થવાની ચેતવણી પ્રમુખ ડોનાલ્ડ ટ્રમ્પના આર્થિક સલાહકારોએ આપી છે. વ્હાઇટ હાઉસના એક મેમોમાં જણાવવામાં આવ્યું છે કે જ્યાં સુધી શટડાઉન ચાલુ રહેશે, ત્યાં સુધી અમેરિકાની ગ્રોસ ડોમેસ્ટિક પ્રોડક્ટ (GDP) ને દર અઠવાડિયે લગભગ ૧૫ અબજ ડૉલરનું મોટું નુકસાન થઈ શકે છે.જો આ સરકારી શટડાઉન એક મહિના સુધી ખેંચાશે, તો ૧૯ લાખ ફેડરલ સરકારના કર્મચારીઓના નુકસાન ઉપરાંત ૪૩,૦૦૦ થી વધુ લોકોએ તેમની નોકરી ગુમાવવી પડશે. ફેડરલ સરકારના ૧૯ લાખ કર્મચારીઓ કાં તો પગાર વિના કામ કરી રહ્યા છે અથવા રજા પર છે, જેમાંથી ૮૦ ટકા કર્મચારીઓ વોશિંગ્ટનમાં રહે છે.

વ્હાઇટ હાઉસના પ્રવક્તા કુશ દેસાઇએ ડેમોક્રેટ્સ પર ગંભીર આરોપ લગાવ્યો છે. તેમણે કહ્યું કે, “સરકારી શટડાઉનના વાસ્તવિક આર્થિક પરિણામોની જવાબદારી સેનેટ ડેમોક્રેટ્સ પર છે, જેઓ ગેરકાયદેસર ઇમિગ્રન્ટ્સને મફત આરોગ્ય સંભાળ પૂરી પાડવા માટે ફેડરલ સરકાર, અર્થતંત્ર અને રાષ્ટ્રને બંધક બનાવી રહ્યા છે.”

આંતરિક સૂત્રોના જણાવ્યા અનુસાર, વ્હાઇટ હાઉસના આ સહાયકો આ દસ્તાવેજ રિપબ્લિકનના સાંસદોને મોકલશે, જેથી તેઓ શટડાઉન માટેની તેમની રાજકીય વ્યૂહરચના નક્કી કરી શકે. હાલમાં, કોંગ્રેસમાં ઓબામા કેર આરોગ્ય વીમા સબસિડી માટેના ભંડોળ અંગે વિભાજન જોવા મળી રહ્યું છે, જેને ટ્રમ્પ વહીવટીતંત્ર ગેરકાયદે ઇમિગ્રન્ટ્સને જતું હોવાનો દાવો કરે છે.