ગાંધીનગર સિવિલ હોસ્પિટલ ખાતે ‘વર્લ્ડ ઓરલ હેલ્થ મંથ’ની ઉજવણી: સફાઈ કર્મચારીઓનું ઓરલ કેન્સર સ્ક્રીનિંગ કરાયું

GMERS મેડિકલ કોલેજ અને સિવિલ હોસ્પિટલ, ગાંધીનગરના ડેન્ટિસ્ટ્રી વિભાગ દ્વારા ૨૦ માર્ચ ૨૦૨૬ થી ૧૯ એપ્રિલ ૨૦૨૬ સુધી એક મહિના માટે ‘વર્લ્ડ ઓરલ હેલ્થ મંથ’ની વિશેષ ઉજવણી કરવામાં આવી રહી છે. આ ઉજવણીના ભાગરૂપે હોસ્પિટલના તમામ સફાઈ કર્મચારીઓ માટે ઓરલ સ્ક્રીનિંગ, કેન્સર અવેરનેસ પ્રોગ્રામ અને તમાકુ છોડવા માટેના કાઉન્સિલિંગનું આયોજન કરવામાં આવ્યું હતું.

આ કાર્યક્રમનું મુખ્ય આકર્ષણ ડેન્ટલ વિભાગના સભ્યો દ્વારા ભજવવામાં આવેલ એક લઘુ નાટક હતું, જેમાં તમાકુના સેવનની હાનિકારક અસરો, તમાકુ મુક્તિનું મહત્વ અને મુખના કેન્સરથી બચવાના ઉપાયો સચોટ રીતે દર્શાવવામાં આવ્યા હતા. આ પ્રસંગે ડેન્ટલ વિભાગના પ્રાધ્યાપક અને વડા ડૉ. પ્રિયંકા સુતરીયા તેમજ સહ-પ્રાધ્યાપક ડૉ. સુજય શાહ દ્વારા કર્મચારીઓનું ઓરલ કેન્સર સ્ક્રીનિંગ કરવામાં આવ્યું હતું. સાથે જ સાઇક્યાટ્રીક વિભાગ દ્વારા તમાકુની લત છોડવા માટે મેન્ટલ હેલ્થનું મહત્વ સમજાવવામાં આવ્યું હતું અને તમામ કર્મચારીઓએ મોંઢાનું કેન્સર અટકાવવા માટેના શપથ પણ લીધા હતા.

નોંધનીય છે કે ગાંધીનગર સિવિલ હોસ્પિટલની ડેન્ટલ ઓ.પી.ડી.માં દર મહિને અંદાજે ૧૨૦૦ થી ૧૪૦૦ જેટલા દર્દીઓ (દૈનિક ૫૦-૬૦ દર્દીઓ) સારવાર મેળવે છે. આ આખો મહિનો ચાલનાર પ્રોગ્રામમાં ‘સ્વસ્થ મુખ થી ખુશહાલ જીવન’ના જાગૃતિ કાર્યક્રમ અંતર્ગત ડેન્ટલ વિભાગને ફુગ્ગા અને સેલ્ફી બુથથી વિશેષ રીતે શણગારવામાં આવ્યો છે, જેનો મુખ્ય મંત્ર “A HAPPY MOUTH IS A HAPPY LIFE” છે. આ સમગ્ર આયોજન મેડિકલ સુપ્રિટેન્ડન્ટ ડૉ. મીતા પરિખ અને ડીન ડૉ. અંકુર ઝાલાવાડીયાના સંપૂર્ણ માર્ગદર્શન હેઠળ સફળતાપૂર્વક સંપન્ન થયું છે.