ગાંધીનગરમાં બિનહથિયારી પો.સ.ઇ. ખાસ સ્પર્ધાત્મક પરીક્ષા સંદર્ભે સેક્ટર-૧૫માં ૧૦૦ મીટરની ત્રિજ્યામાં કડક આદેશ, ઝેરોક્ષ સેન્ટરો બંધ

ગુજરાત પોલીસ ભરતી બોર્ડ દ્વારા આગામી તા. ૨૮/૦૬/૨૦૨૬ ના રોજ બિનહથિયારી પો.સ.ઇ. ખાસ સ્પર્ધાત્મક પરીક્ષા (મોડ-૨) અંતર્ગત લેખિત પરીક્ષા (પેપર-૨) નું આયોજન કરવામાં આવ્યું છે. ગાંધીનગરના સેક્ટર-૧૫ ખાતે આવેલ LDRP કેમ્પસ, VPMP પોલિટેકનિક અને કડી સર્વ વિશ્વવિદ્યાલય ખાતે નિયત કરાયેલા કુલ ૦૬ પરીક્ષા કેન્દ્રોના ૬૪ બ્લોક પર કુલ ૧,૯૨૦ જેટલા પરીક્ષાર્થી ઉમેદવારો આ પરીક્ષા આપનાર છે.
આ પરીક્ષા શાંતિપૂર્ણ, નિષ્પક્ષ અને ભયમુક્ત વાતાવરણમાં યોજાય તેમજ ઉમેદવારો કોઈપણ પ્રકારની ગેરરીતિ કે પ્રલોભન વગર પરીક્ષા આપી શકે તે હેતુથી ગાંધીનગર જિલ્લાના જિલ્લા મેજિસ્ટ્રેટ શ્રી રવિન્દ્ર ખતાલે દ્વારા ભારતીય નાગરિક સુરક્ષા સંહિતાની કલમ-૧૬૩ અન્વયે પરીક્ષા કેન્દ્રોની આસપાસના ૧૦૦ મીટરના વિસ્તારને પ્રતિબંધિત વિસ્તાર જાહેર કરતું જાહેરનામું બહાર પાડવામાં આવ્યું છે.
પરીક્ષા દરમિયાન નીચે મુજબના કૃત્યો કરવા પર સંપૂર્ણ પ્રતિબંધ રહેશે
૧. પરીક્ષા કેન્દ્રોની આસપાસના ૧૦૦ મીટરની ત્રિજ્યામાં સક્ષમ અધિકારીશ્રીની મંજૂરી વિના ચાર કે તેથી વધુ વ્યક્તિઓએ એકત્ર થવું નહીં તેમજ સભાઓ ભરવી નહીં.
૨. પરીક્ષા કેન્દ્રોની આસપાસ આવેલી તમામ ઝેરોક્ષ સેન્ટરો/ઝેરોક્ષની દુકાનો પરીક્ષા સમય દરમિયાન સંપૂર્ણપણે બંધ રાખવાની રહેશે.
૩. પરીક્ષા સ્થળે ઇલેક્ટ્રિક આઇટમ જેવી કે મોબાઇલ ફોન, પેજર, ઇલેક્ટ્રિક ડાયરી, સ્માર્ટ વોચ કે અન્ય કોઇપણ પ્રકારના ઇલેક્ટ્રોનિક ઉપકરણો લઈ જવા પર પ્રતિબંધ રહેશે.
૪. પરીક્ષામાં ચોરી કરવા કે કરાવવાના હેતુથી કોઈપણ પુસ્તક, કાપલીઓ અથવા ઝેરોક્ષ નકલો લાવવા કે લઈ જવા પર પ્રતિબંધ રહેશે.
૫. પરીક્ષા કેન્દ્રની આસપાસ મોટા અવાજે લાઉડ સ્પીકર વગાડવા તેમજ ધ્વનિ પ્રદૂષણ ફેલાવતા સાધનોના ઉપયોગ પર પ્રતિબંધ રહેશે.
૬. પરીક્ષા સ્થળની આસપાસ પાન-બીડીના ગલ્લા તથા ચા-પાણીની દુકાનો પરીક્ષા સમય દરમિયાન ચાલુ રાખી શકાશે નહીં.
૭. પરીક્ષા કેન્દ્રમાં ઉમેદવારો અને પરીક્ષા લક્ષી કામગીરીમાં રોકાયેલ સત્તાવાર સ્ટાફ સિવાય અન્ય કોઈ બિનઅધિકૃત વ્યક્તિઓએ પ્રવેશ કરવો નહીં.

આ હુકમ ફરજ પરના પોલીસ કર્મચારીઓ, હોમગાર્ડ્ઝ, પરીક્ષાના અધિકારીઓ તેમજ પરીક્ષાની વ્યવસ્થા સંદર્ભે રોકાયેલા અધિકૃત સ્ટાફને લાગુ પડશે નહીં. આ જાહેરનામાના નિયમોનો ભંગ કરનાર વ્યક્તિ સામે ભારતીય ન્યાય સંહિતા (BNS) ૨૦૨૩ ની કલમ-૨૨૩ મુજબ કાયદેસરની કાર્યવાહી અને શિક્ષા કરવામાં આવશે.