ગાંધીનગર જિલ્લામાં સ્થાનિક સ્વરાજ્યની ચૂંટણીઓ સંદર્ભે પ્રતિબંધાત્મક આદેશો જાહેર

રાજ્ય ચૂંટણી આયોગ દ્વારા ગાંધીનગર મહાનગરપાલિકા તેમજ નગરપાલિકાઓની સામાન્ય અને પેટાચૂંટણીઓનો કાર્યક્રમ જાહેર કરવામાં આવ્યો છે. જે અંતર્ગત ગાંધીનગર મહાનગરપાલિકા વિસ્તારમાં તા. ૧૬/૦૯/૨૦૨૬ થી આદર્શ આચારસંહિતા અમલમાં આવી છે. આ ચૂંટણીઓ માટે તા. ૧૧/૧૦/૨૦૨૬ ના રોજ મતદાન અને તા. ૧૩/૧૦/૨૦૨૬ ના રોજ મતગણતરી યોજાશે તેમજ સમગ્ર ચૂંટણી પ્રક્રિયા તા. ૧૬/૧૦/૨૦૨૬ ના રોજ પૂર્ણ થશે.

ચૂંટણી પ્રક્રિયા શાંતિપૂર્ણ, મુક્ત અને ન્યાયી વાતાવરણમાં યોજાય તે હેતુથી જિલ્લા મેજિસ્ટ્રેટશ્રી રવિન્દ્ર ખતાલે દ્વારા ચૂંટણી યોજાનાર વિસ્તારો માટે કેટલીક પ્રવૃત્તિઓ પર પ્રતિબંધ ફરમાવતો આદેશ જારી કરવામાં આવ્યો છે. રાજ્ય ચૂંટણી આયોગના આદેશ મુજબ, કોઈપણ રાજકીય પક્ષ કે ચૂંટણીના ઉમેદવાર સાથે સીધી કે આડકતરી રીતે સંકળાયેલ વ્યક્તિ ચૂંટણી અધિકારીશ્રી અથવા સક્ષમ અધિકારીશ્રીની પૂર્વ પરવાનગી સિવાય ચૂંટણી કામગીરી માટે વાહનોનો ઉપયોગ કરી શકશે નહીં. ચૂંટણી પ્રચારનો સમયગાળો પૂરો થયા બાદ એટલે કે મતદાન પૂરું થવાના ૪૮ કલાક પહેલાં જે રાજકીય પક્ષોના હોદ્દેદારો, કાર્યકરો કે પ્રચારકો તે વિસ્તારના મતદાર ન હોય, તેમણે તે મતદાર વિભાગમાં હાજર રહેવું નહીં અને વિસ્તાર છોડી દેવાનો રહેશે.

પ્રચાર અર્થે આવેલા રાજકીય પક્ષના કાર્યકરો, સરઘસ કાઢનારાઓ કે પ્રચારકો માટે મતદાન પૂરું થવાના ૪૮ કલાક પહેલા વિશ્રામગૃહ કે અતિથિગૃહમાં રૂમ ફાળવી શકાશે નહીં. લોકપ્રતિનિધિત્વની જોગવાઈઓનું રાજકીય પક્ષો, ઉમેદવારો તથા તેમના કાર્યકરોએ ચુસ્તપણે પાલન કરવાનું રહેશે. આ હુકમ ચૂંટણી પ્રક્રિયા પૂર્ણ થાય ત્યાં સુધી તા. ૧૬/૧૦/૨૦૨૬ સુધી સમગ્ર ચૂંટણી વિસ્તારમાં અમલમાં રહેશે. આ જાહેરનામાના ભંગ કે ઉલ્લંઘન કરનાર ઈસમ સામે કાયદેસરની કાર્યવાહી તથા દંડ કરવામાં આવશે. આ હુકમનો ભંગ કરનાર સામે ફરિયાદ નોંધવા માટે હેડ કોન્સ્ટેબલ કે તેનાથી ઉચ્ચ હોદ્દો ધરાવનાર તમામ પોલીસ અધિકારીઓને અધિકૃત કરવામાં આવ્યા છે.