EWSને 10% અનામત પર સુપ્રીમની મહોર

સુપ્રીમ કોર્ટે આર્થિક રીતે નબળા વર્ગ (EWS) માટે 10% અનામતની સિસ્ટમ પર પોતાનો ચુકાદો આપ્યો છે. સુપ્રીમ કોર્ટે આર્થિક રીતે નબળા વર્ગ માટે અનામતને સમર્થન આપ્યું છે. દરમિયાન જસ્ટિસ મહેશ્વરીએ કહ્યું કે આર્થિક અનામત બંધારણના મૂળભૂત માળખાની વિરુદ્ધ નથી. જસ્ટિસ બેલા એમ ત્રિવેદી, જસ્ટિસ મહેશ્વરીએ EWSને યોગ્ય ગણાવ્યું છે. બંનેએ 2019ના સુધારાને સમર્થન આપ્યું છે. જસ્ટિસ પારડીવાલાએ પણ આ વાતનું સમર્થન કર્યું છે. EWS ક્વોટાની માન્યતાને પડકારતી 30 થી વધુ અરજીઓની સુનાવણી બાદ કોર્ટે 27 સપ્ટેમ્બરે પોતાનો ચુકાદો અનામત રાખ્યો હતો. મુખ્ય ન્યાયાધીશ યુયુ લલિતની આગેવાની હેઠળની પાંચ સભ્યોની બંધારણીય બેન્ચે આ મામલે પોતાનો ચુકાદો સંભળાવ્યો. જેમાં 3 ન્યાયાધીશોએ આ અનામતનું સમર્થન કર્યું છે, જ્યારે બે ન્યાયાધીશો રવિન્દ્ર ભટ અને મુખ્ય ન્યાયાધીશ લલિતએ અનામતનો વિરોધ કર્યો છે. જસ્ટિસ બેલા એમ. ત્રિવેદીએ કહ્યું કે મારો નિર્ણય જસ્ટિસ મહેશ્વરીના અભિપ્રાય સાથે સહમત છે. તેમણે કહ્યું કે EWS ક્વોટા માન્ય અને બંધારણીય છે. 5 જજની બંધારણીય બેંચમાં જસ્ટિસ એસ. રવિન્દ્ર ભટ અને જસ્ટિસ યુયુ લલિત આ અનામતની વિરુદ્ધ ગયા હતા. ચીફ જસ્ટિસ લલિતે તેને ગેરબંધારણીય ગણાવ્યું. ભટે કહ્યું કે, આ કાયદો ભેદભાવથી ભરેલો છે અને બંધારણની મૂળ ભાવના વિરુદ્ધ છે. તમને જણાવી દઈએ કે EWS આરક્ષણ અધિનિયમ 2019ને સંસદ દ્વારા બંધારણમાં 103મા સુધારા દ્વારા પસાર કરવામાં આવ્યો હતો. આ નિર્ણયને સુપ્રીમ કોર્ટમાં ઘણી અરજીઓ દ્વારા પડકારવામાં આવ્યો હતો, જેના પર લાંબી સુનાવણી બાદ કોર્ટે આજે પોતાનો ચુકાદો આપ્યો હતો. સુપ્રીમ કોર્ટે 27 સપ્ટેમ્બરે તત્કાલિન એટર્ની જનરલ કેકે વેણુગોપાલ અને સોલિસિટર જનરલ તુષાર મહેતા સહિત વરિષ્ઠ વકીલોની દલીલો સાંભળ્યા પછી, બંધારણના મૂળભૂત માળખાનું ઉલ્લંઘન કરતા EWS અનામતના કાયદાકીય પ્રશ્ન પર પોતાનો ચુકાદો અનામત રાખ્યો હતો. શિક્ષણશાસ્ત્રી મોહન ગોપાલે 13 સપ્ટેમ્બરે બેન્ચ સમક્ષ આ મામલે દલીલ કરી હતી અને EWS આરક્ષણ સુધારાનો વિરોધ કર્યો હતો. બેંચમાં જસ્ટિસ દિનેશ મહેશ્વરી, જસ્ટિસ એસ રવિન્દ્ર ભટ, જસ્ટિસ બેલા એમ ત્રિવેદી અને જસ્ટિસ જેબી પારડીવાલા પણ સામેલ હતા. તમિલનાડુ તરફથી હાજર રહેલા વરિષ્ઠ વકીલ શેખર નાફડે, EWS ક્વોટાનો વિરોધ કરતા કહ્યું કે આર્થિક માપદંડ વર્ગીકરણનો આધાર હોઈ શકે નહીં અને જો તે ક્વોટાને જાળવી રાખવાનું નક્કી કરે તો સુપ્રીમ કોર્ટે ઈન્દિરા સાહનીના નિર્ણય પર પુનર્વિચાર કરવો પડશે.