ગુજરાતમાં વરસાદનો નવો રાઉન્ડ શરૂ: આગામી દિવસોમાં ભારે વરસાદની આગાહી

અમદાવાદ: ગુજરાતમાં લાંબા વિરામ બાદ મેઘરાજાનું પુનરાગમન થયું છે અને રાજ્યમાં વરસાદનો નવો રાઉન્ડ શરૂ થયો છે. હવામાન વિભાગે આજે અમદાવાદ સહિત રાજ્યભરમાં વરસાદની આગાહી કરી છે, જે આગામી 19 ઓગસ્ટ સુધી ચાલુ રહેવાની સંભાવના છે. રાજ્યમાં ત્રણ વરસાદી સિસ્ટમ સક્રિય હોવાથી ઘણી જગ્યાએ ભારે વરસાદ પડી શકે છે.

આજે ક્યાં પડશે વરસાદ? હવામાન વિભાગના જણાવ્યા અનુસાર, આજે (16 ઓગસ્ટ) સાબરકાંઠા, અરવલ્લી, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ, દમણ, દાદરા નગર હવેલી, જૂનાગઢ, અમરેલી, ભાવનગર, ગીર સોમનાથ અને દીવમાં ભારે વરસાદની શક્યતા છે.

આ ઉપરાંત, અમદાવાદ, આણંદ, બનાસકાંઠા, પાટણ, મહેસાણા, ગાંધીનગર, ખેડા, સુરેન્દ્રનગર, રાજકોટ, જામનગર, પોરબંદર, મોરબી, દ્વારકા, બોટાદ અને કચ્છ સહિતના અન્ય વિસ્તારોમાં પણ હળવાથી સામાન્ય વરસાદની આગાહી કરવામાં આવી છે.

આગામી દિવસોમાં ભારે વરસાદની સંભાવના: હવામાન વિભાગે આગાહી કરી છે કે આગામી 19 ઓગસ્ટ સુધી પંચમહાલ, દાહોદ, મહીસાગર, વડોદરા, છોટા ઉદેપુર, બનાસકાંઠા, સાબરકાંઠા, મહેસાણા, અરવલ્લી, ખેડા અને આણંદમાં ભારે વરસાદ પડી શકે છે. આ વરસાદ ખેડૂતો અને જળાશયો માટે રાહતરૂપ સાબિત થઈ શકે છે.