રાજ્ય સરકાર દ્વારા રવિ માર્કેટીંગ સીઝન ૨૦૨૬-૨૭ અંતર્ગત ખેડુતો પાસેથી લઘુતમ ટેકાના ભાવે બાજરી, જુવાર તથા મકાઈની સીધી ખરીદી કરાશે

ગાંધીનગર તા.૩૦ માર્ચ-
રાજ્ય સરકાર દ્વારા ખેડૂતોને તેઓના ઉત્પાદનના પોષણક્ષમ ભાવ મળી રહેવા પામે તે માટે રવિ માર્કેટીંગ સીઝન ૨૦૨૬-૨૭ અંતર્ગત લઘુતમ ટેકાના ભાવે બાજરી, જુવાર તથા મકાઈ ની ખરીદી ગુજરાત રાજ્ય નાગરીક પુરવઠા નિગમ લી, મારફતે કરવામાં આવનાર છે. લઘુતમ ટેકાના ભાવે બાજરી, જુવાર તથા મકાઈ ના વેચાણ કરવા ઇચ્છતા ગાંધીનગર જિલ્લાના ખેડૂતોની ઓનલાઇન નોંધણી સ્થાનિક ગ્રામ્ય કક્ષાએ VCE મારફતે તા. ૦૧/૦૪/૨૦૨૬ થી ૩૦/૦૪/૨૦૨૬ સુધીમાં તથા તા.૦૧/૦૫/૨૦૨૬ થી ૧૫/૦૭/૨૦૨૬ સુધીમાં ખરીદી કરવામાં આવશે. આ માટે ખેડૂત ખાતેદારોની બાયોમેટ્રીક ઓથેન્ટીકેશન દ્વારા નોંધણી કરવામાં આવશે.
નોંધણી માટે જરૂરી પુરાવાં જેવા કે, આધાર કાર્ડની નકલ, અદ્યતન ગામ નમૂનો, ૭/૧૨,૮/અ તેમજ પાકની વાવણી અંગેની એન્ટ્રી, ૭/૧૨ કે ૮/અ માં એન્ટ્રી ન થઈ હોય તો તલાટીના સહી સિક્કાવાળો દાખલો, ખેડૂતના નામના બેંક ખાતાની વિગત, બેંક પાસબૂકની ઝેરોક્ષ નકલ અથવા કેન્સલ ચેકની નકલ સાથે લાવવાની રહેશે. રાજ્યના ખેડૂતો તેઓનો પાક લઘુતમ ટેકાના ભાવે વેચાણ કરવા ઇચ્છુક હોય તો તેઓની ઓનલાઇન નોંધણી ફરજીયાત હોઇ આ માટે સંબંધિત ગ્રામપંચાયતનો સંપર્ક કરી નોંધણી કરાવવા ખાસ અનુરોધ છે.
ટેકાના ભાવે ખરીદી માટે રજીસ્ટ્રેશન કરાવેલ ખેડૂતોને SMS મારફતે ખરીદી અંગેની જાણ કરવામાં આવશે. ખરીદી સમયે ખેડૂતે પોતાનું આધારકાર્ડ/ઓળખપત્ર સાથે રાખવાનું રહેશે. ખેડૂત ખાતેદારના બાયોમેટ્રીક ઓથેન્ટીકેશન દ્વારા જ જથ્થો ખરીદી કરવામાં આવશે, જેની નોંધ લેવા વિનંતી છે. ડોક્યુમેન્ટની ચકાસણી દરમ્યાન જો ખોટા ડોક્યુમેન્ટ અપલોડ કરાયા હોવાનું ધ્યાને આવશે તેવા કિસ્સામાં ખેડૂતનો ક્રમ રદ થશે અને ખરીદી માટે જાણ નહી કરવામાં આવે તેની ખેડૂત મિત્રોએ નોંધ લેવા તથા નોંધણી બાબતે કોઇ મુશકેલી જણાય તો હેલ્પલાઈન નંબર ૮૫૧૧૧૭૧૭૧૮ તથા ૮૫૧૧૧૭૧૭૧૯ ઉપર સંપર્ક કરવા ઇન્ચાર્જ જિલ્લા પુરવઠા અધિકારી શ્રી ગાંધીનગરની યાદીમાં જણાવાયું છે.
ભારત સરકાર દ્વારા રવિ માર્કેટીંગ સીઝન ૨૦૨૬-૨૭ માટે બાજરી રૂ. ૨૭૭૫/- પ્રતિ કવી, જુવાર માલદંડી- માટે રૂ. ૩૭૪૯/- પ્રતિ ક્વી,જુવાર-હાઈબ્રીડ માટે રૂ. ૩૬૯૯/- પ્રતિ વી તથા મકાઈ માટે રૂ. ૨૪૦૦/– પ્રતિ ક્વી લઘુત્તમ ટેકાનો દર નિયત કરવામાં આવેલ છે. ખેડૂતોને મહત્તમ ટેકાના ભાવનો લાભ મળી રહેવા પામે તે માટે બાજરી તેમજ જુવારની ખરીદી ઉપર ટેકાના ભાવ ઉપરાંત રૂ. ૩૦૦/- પ્રતિ વિ. ” બોનસની ચુકવણી કરવામાં આવશે.