રાષ્ટ્ર નિર્માણના મહત્ત્વપૂર્ણ કાર્યમાં સહભાગી બનવા ગાંધીનગર જિલ્લા કલેક્ટરની નગરજનોને અપીલ

ગાંધીનગર જિલ્લાના તમામ નાગરિકોને રાષ્ટ્ર નિર્માણની અત્યંત મહત્વપૂર્ણ પ્રક્રિયા એવી ‘જનગણના ૨૦૨૭’ માં સક્રિયપણે જોડાવવા માટે ગાંધીનગર જિલ્લા કલેક્ટર શ્રી રવિન્દ્ર ખતાલે દ્વારા અપીલ કરવામાં આવી છે. ભારત સરકાર દ્વારા હાથ ધરવામાં આવતી આ વસ્તી ગણતરીમાંથી પ્રાપ્ત થતી માહિતીનો ઉપયોગ જનહિતલક્ષી વિવિધ યોજનાઓના આયોજન, તેના અમલીકરણ અને દેશના વિકાસ કાર્યોને વધુ અસરકારક બનાવવા માટે ખૂબ જ ઉપયોગી સાબિત થાય છે.

ગુજરાત રાજ્યમાં જનગણના ૨૦૨૭ અંતર્ગત ‘સ્વ-ગણતરી’ પ્રક્રિયાની શરૂઆત રાજ્યના માનનીય મુખ્યમંત્રીશ્રી દ્વારા સત્તાવાર રીતે કરવામાં આવી છે. આ ઓનલાઈન પ્રક્રિયા આગામી ૧૭ મે થી ૩૧ મે ૨૦૨૬ દરમિયાન કાર્યરત રહેશે. આ સમયગાળા દરમિયાન દિવસના ૨૪ કલાકમાં ગમે ત્યારે, રાજ્યના કોઈપણ ખૂણેથી નાગરિકો ભારત સરકારના સત્તાવાર પોર્ટલ se.census.gov.in પર જઈને ખૂબ જ સરળતાથી પોતાની અને પોતાના પરિવારની સ્વ-ગણતરી કરી શકશે.

આ ડિજિટલ પ્રક્રિયા અંગે વધુ વિગતો આપતા કલેક્ટરશ્રીએ જણાવ્યું હતું કે, નાગરિકો મોબાઈલ અથવા કમ્પ્યુટરના માધ્યમથી ઘરે બેઠા જ માત્ર થોડી મિનિટોમાં પોતાના વર્તમાન રહેઠાણ અને પરિવારની વિગતો ઓનલાઈન નોંધી શકે છે. સૌથી મહત્વની બાબત એ છે કે આ પ્રક્રિયા દરમિયાન નાગરિકોએ કોઈ પણ પ્રકારના દસ્તાવેજો અપલોડ કરવાના રહેતા નથી. ઓનલાઈન સ્વ-ગણતરી પૂર્ણ થયા બાદ સિસ્ટમ દ્વારા એક વિશિષ્ટ ‘SE ID’ જનરેટ થશે, જેનો મેસેજ નાગરિકના રજિસ્ટર્ડ મોબાઈલ નંબર પર મોકલવામાં આવશે. આ ‘SE ID’ નાગરિકોએ સાચવી રાખવાનો રહેશે અને જ્યારે વસ્તી ગણતરીના સત્તાવાર ગણતરીદાર તેમના ઘરે રૂબરૂ મુલાકાતે આવે ત્યારે તેમને આ આઈડી દર્શાવવાનો રહેશે.

કલેક્ટરશ્રીએ ઉમેર્યું હતું કે, “મેં પોતે પણ મારી સ્વ-ગણતરી જાતે જ ઓનલાઈન પૂર્ણ કરી છે અને આ પ્રક્રિયા અત્યંત સરળ છે.” તેમ છતાં, જો જિલ્લાના કોઈ પણ નાગરિકને આ ઓનલાઈન પ્રક્રિયા દરમિયાન કોઈ મુશ્કેલી જણાય, તો તેઓ ગાંધીનગર કલેક્ટર કચેરીના સંબંધિત સ્ટાફનો અથવા તો સરકારના સત્તાવાર ટોલ-ફ્રી નંબર ૧૮૫૫ પર સીધો સંપર્ક કરીને જરૂરી માર્ગદર્શન મેળવી શકે છે.

રાષ્ટ્રહિતની આ સર્વોચ્ચ અને મહત્વપૂર્ણ પ્રક્રિયામાં દરેક પરિવાર અચૂક સહભાગી બને અને વસ્તી ગણતરીમાં પોતાની સાચી તથા સચોટ માહિતી આપીને દેશના વિકાસ અને ‘વિકસિત ભારત’ ના નિર્માણમાં પોતાનું અમૂલ્ય યોગદાન આપે તેવી કલેક્ટરશ્રી દ્વારા વિનંતી કરવામાં આવી છે.