ઉધોગભવનનો ક્લાસ -૨ અધિકારી લાંચ લેતા રંગેહાથ ઝડપાયો

રાજ્યના પાટનગર ગાંધીનગરમાં એન્ટી કરપ્શન બ્યુરો (ACB) દ્વારા સફળ ટ્રેપ ઓપરેશન પાર પાડવામાં આવ્યું છે. મળતી માહિતી મુજબ ઉદ્યોગ ભવન ખાતે આસિસ્ટન્ટ ઇલેક્ટ્રિકલ ઇન્સ્પેક્ટર (વર્ગ-૨) તરીકે ફરજ બજાવતા અધિકારી મનિશકુમાર નવીનચંદ્ર રાવલ ને કુલ ૫,૦૦,૦૦૦ ની લાંચ ના કેસમાં રૂ.૫૦,૦૦૦ લેતા રંગેહાથ ઝડપી પાડવામાં આવ્યા છે. સૂત્રો મુજબ ઘ-૨ સર્કલ પાસે જાહેર રોડ વિસ્તારમાં લાંચ સ્વીકારતી વખતે ACBની ટીમે કાર્યવાહી કરી હતી. અમદાવાદ શાખાની ACB ટીમે આ હાઈપ્રોફાઈલ ટ્રેપને સફળતાપૂર્વક અંજામ આપ્યો હોવાનું જાણવા મળ્યું છે.
ઘટનાની મળતી માહિતી અનુસાર આ કામના ફરીયાદી બાંધકામોનાં પ્રોજેક્ટોમાં પેશીવ ફાયર સીસ્ટમનું કામ કરતા હોય જે પેશીવ ફાયર સીસ્ટમનાં પ્રમાણપત્ર જે પ્રોજેક્ટ માલિક મારફતે આક્ષેપીત આસી. ઈલેક્ટ્રીકલ ઈન્સપેક્ટર, ગાંધીનગર સમક્ષ રજુ થતા હોય જે પ્રમાણપત્ર માન્ય રાખવા અને ઈશ્યુ કરેલ એન.ઓ.સી. અંગે આ કામના આક્ષેપીત નાઓએ ફરીયાદી પાસે રૂ.૫,૦૦,૦૦૦/-ની લાંચની માંગણી કરેલ તે વખતે ફરીયાદીએ આ કામના આક્ષેપીતને તેમની માંગણી મુજબના નાંણા ટુકડે ટુકડે આપવા જણાવેલ અને આજરોજ રૂ.૫૦,૦૦૦/- આપવાનો વાયદો કરેલ પરંતુ ફરીયાદી લાંચની રકમ આપવા માંગતા ન હોય જેથી ફરીયાદીએ એ.સી.બી.નો સંપર્ક કરી ફરીયાદ આપતા આજરોજ લાંચનુ છટકુ ગોઠવતા લાંચના છટકા દરમ્યાન આક્ષેપીતે ફરીયાદી સાથે રૂબરૂમાં હેતુલક્ષી વાતચીત કરી લાંચ પેટે રૂ.૫૦,૦૦૦/- લાંચની રકમ સ્થળ ઉપર સ્વીકારી પકડાઇ ગયેલ છે. અને આ ભ્રષ્ટાચારી અધિકારી વિરુદ્ધ ગુનો નોંધી આગળની કાયદેસરની કાર્યવાહી હાથ ધરી છે.

🔹 આરોપી અધિકારી સામે ભ્રષ્ટાચાર નિવારણ અધિનિયમ હેઠળ કાર્યવાહી શરૂ
🔹 ACB દ્વારા વધુ તપાસ હાથ ધરાઈ
🔹 ઘટનાને લઈને સરકારી તંત્રમાં ખળભળાટ