ગુજરાતમાં હાર્ટ એટેકનો વિસ્ફોટ! માત્ર 6 મહિનામાં 53 હજારથી વધુ કેસ, સાઇલન્ટ કિલર બની રહ્યો હૃદયરોગ
અમદાવાદ: ગુજરાતમાં હૃદયરોગ અને હાર્ટ એટેકના કેસોમાં ચિંતાજનક ઉછાળો નોંધાયો છે. વર્ષ 2025ના પ્રથમ છ મહિનામાં રાજ્યમાં હૃદયરોગના 53,329થી વધુ કેસ નોંધાયા છે, જે ગયા વર્ષની સરખામણીએ અંદાજે 15.36 ટકા વધારો દર્શાવે છે. રાજ્યના વિવિધ જિલ્લાઓમાં હાર્ટ સંબંધિત ગંભીર દર્દીઓની સંખ્યામાં સતત વધારો થતાં આરોગ્ય વિભાગ અને નિષ્ણાતોએ ચિંતા વ્યક્ત કરી છે. સૌથી વધુ 13,760 કેસ અમદાવાદમાં નોંધાયા છે, જ્યારે સુરત, રાજકોટ, વડોદરા, જામનગર અને ભાવનગર જેવા મોટા શહેરોમાં પણ કેસોમાં નોંધપાત્ર વધારો થયો છે.
આંકડાઓ મુજબ મોરબી અને દેવભૂમિ દ્વારકા જિલ્લામાં સૌથી વધુ ટકાવારીથી વધારો નોંધાયો છે. તબીબોના જણાવ્યા મુજબ અનિયમિત જીવનશૈલી, વધુ તણાવ, હાઈ બ્લડ પ્રેશર, ડાયાબિટીસ, સ્થૂળતા, ધૂમ્રપાન, દારૂનું સેવન, જંક ફૂડ અને કસરતનો અભાવ હૃદયરોગના મુખ્ય કારણો બની રહ્યા છે. છેલ્લા કેટલાક વર્ષોમાં યુવાનોમાં પણ હાર્ટ એટેકના કેસોમાં વધારો નોંધાતા સ્થિતિ વધુ ગંભીર બની છે.
નિષ્ણાતોએ લોકોને નિયમિત આરોગ્ય તપાસ, સંતુલિત આહાર, દૈનિક કસરત, બ્લડ પ્રેશર અને બ્લડ શુગર પર નિયંત્રણ રાખવાની તેમજ છાતીમાં દુખાવો, શ્વાસ લેવામાં તકલીફ, અચાનક પરસેવો કે બેચેની જેવા લક્ષણો દેખાય તો તાત્કાલિક તબીબી સારવાર લેવાની અપીલ કરી છે. આરોગ્ય નિષ્ણાતોના મતે સમયસર સારવાર અને જીવનશૈલીમાં ફેરફાર દ્વારા હૃદયરોગના જોખમને ઘણાં અંશે ઘટાડી શકાય છે.
