ગાંધીનગર

ગાંધીનગર જિલ્લામાં સ્વસહાય જૂથોને ક્રેડિટ લોન અંગે માર્ગદર્શન આપવા વિશેષ ઝુંબેશનો પ્રારંભ

રાષ્ટ્રીય ગ્રામીણ આજીવિકા મિશન (NRLM) અંતર્ગત ગ્રામ્ય વિસ્તારની મહિલાઓ આર્થિક રીતે પગભર બને અને પોતાના જીવનધોરણને ઊંચું લાવી આત્મનિર્ભર બની શકે તેવા ઉમદા હેતુથી જિલ્લા વહીવટી તંત્ર અને જિલ્લા ગ્રામ વિકાસ એજન્સી (DRDA), ગાંધીનગર દ્વારા એક વિશેષ માર્ગદર્શન ઝુંબેશ હાથ ધરવામાં આવી છે.

આ વિશેષ ઝુંબેશ તા. ૨૦/૧૧/૨૦૨૬ થી તા. ૨૮/૧૧/૨૦૨૬ દરમિયાન યોજાઈ રહી છે. આ સમયગાળા દરમિયાન ગાંધીનગર જિલ્લાના કુલ ૧૯૮ ગામોની મુલાકાત લેવાનું આયોજન કરવામાં આવ્યું છે, જેમાં દરરોજ અંદાજે ૧૨ ગામોની રૂબરૂ મુલાકાત લઈ મહિલાઓને વિવિધ યોજનાઓ અંગે માહિતગાર કરવામાં આવી રહી છે.ઝુંબેશ અંતર્ગત નિયામકશ્રી (જિલ્લા ગ્રામ વિકાસ એજન્સી), નાયબ જિલ્લા વિકાસ અધિકારીશ્રી, તાલુકા વિકાસ અધિકારીશ્રી, સંબંધિત બેંક મેનેજરશ્રીઓ, અમૂલ પાર્લરના પ્રતિનિધિશ્રીઓ તેમજ NRLMની ટીમ સંયુક્ત રીતે કામગીરી કરી રહી છે. ગાંધીનગર જિલ્લાના કુલ ૩,૯૨૫ સ્વ-સહાય જૂથો પૈકી ૧,૨૩૦ એવા સ્વ-સહાય જૂથો કે જેમણે અત્યાર સુધી એકપણ વાર કેશ ક્રેડિટ લોન લીધેલ નથી, તેમની રૂબરૂ મુલાકાત લઈ તેમને કેશ ક્રેડિટ લોન અંગે વિસ્તૃત સમજણ અને માર્ગદર્શન પૂરું પાડવામાં આવી રહ્યું છે. અત્રે ઉલ્લેખનીય છે કે, આ યોજના હેઠળ રૂ. ૧.૫૦ લાખથી રૂ. ૨૦.૦૦ લાખ સુધીની કેશ ક્રેડિટ લોન સરકારી સબસિડી થકી વ્યાજમુક્ત આપવામાં આવે છે.

આ ઉપરાંત, ગ્રામ્ય કક્ષાએ મહિલાઓને સંગઠિત કરી નવા સ્વ-સહાય જૂથોની રચના કરવા તેમજ મહિલાઓને સ્થાનિક સ્તરે જ રોજગારીની નવી તકો ઉપલબ્ધ થાય તે હેતુથી ગામેગામ ‘અમૂલ પાર્લર’ શરૂ કરવા અંગે પણ જરૂરી માર્ગદર્શન અને સંકલનની કામગીરી હાથ ધરવામાં આવી રહી છે.

ઉલ્લેખનીય છે કે,આ ઝુંબેશના માધ્યમથી ગ્રામ્ય વિસ્તારની વધુમાં વધુ મહિલાઓને સ્વરોજગાર સાથે જોડી તેમની આવકમાં વધારો થાય અને તેઓ આત્મનિર્ભરતા તરફ આગળ વધે તે દિશામાં જિલ્લા વહીવટી તંત્ર દ્વારા સઘન પ્રયાસો હાથ ધરવામાં આવ્યા છે.

ads image

Leave a Reply

Your email address will not be published. Required fields are marked *