ગાંધીનગર કલેક્ટર રવિન્દ્ર ખતાલેએ સ્વચ્છતા ઝુંબેશમાં આપ્યું શ્રમદાન

ગાંધીનગર, ૦૨ ઓક્ટોબર:
‘સ્વચ્છતા હી સેવા’ અભિયાન અંતર્ગત ગાંધીનગર કલેક્ટર કચેરી ખાતે સ્વચ્છતા ઝુંબેશનું આયોજન કરવામાં આવ્યું હતું. આ કાર્યક્રમમાં ગાંધીનગરના કલેક્ટરશ્રી રવિન્દ્ર ખતાલેએ સ્વયં શ્રમદાન કરી સક્રિય ભાગીદારી નોંધાવી હતી અને ઉપસ્થિત સૌને સ્વચ્છતા પ્રત્યે જાગરૂક બનવાનો પ્રેરણાદાયી સંદેશ આપ્યો હતો.
અભિયાન દરમિયાન કલેક્ટરશ્રીએ ગાંધીનગર વિસ્તારમાં આવેલા જાહેર સ્થળો, રસ્તાઓ અને કચેરી પરિસરને સ્વચ્છ બનાવવાના આ ભગીરથ કાર્યમાં જાતે જોડાતાં સમાજને “સ્વચ્છતા એ જ સેવા”નો સ્પષ્ટ સંદેશ આપ્યો હતો.
આ પ્રસંગે પ્રતિક્રિયા આપતાં કલેક્ટરશ્રી રવિન્દ્ર ખતાલે જણાવ્યું હતું કે, “જનભાગીદારી દ્વારા જ સ્વચ્છતા અભિયાનને સાચા અર્થમાં સફળ બનાવી શકાય છે. આપણી આસપાસના જાહેર રસ્તાઓ અને સ્થળોની સ્વચ્છતા જાળવવી એ આપણા સૌની પ્રાથમિક અને નૈતિક ફરજ છે.”
કલેક્ટર કચેરી ખાતે યોજાયેલી આ વિશેષ ઝુંબેશમાં જિલ્લા તંત્રના ઉચ્ચ અધિકારીઓ અને કર્મચારીઓએ ઉત્સાહભેર ભાગ લીધો હતો. આ પ્રસંગે અધિક કલેક્ટરશ્રી અમિત પરમાર, ગાંધીનગર પ્રાંત અધિકારીશ્રી જૈમિન પટેલ, દહેગામ પ્રાંત અધિકારીશ્રી આયુષી પટેલ, નાયબ કલેક્ટરશ્રી (પ્રોટોકોલ) નિહારિકા સુવેરા, નાયબ કલેક્ટરશ્રી (જ.સુ) ઘનશ્યામ ધાંધલિયા, જનસંપર્ક અધિકારીશ્રી પરેશ દેસાઈ, ગાંધીનગર મામલતદારશ્રી મહેશ ગોહેલ સહિત કચેરીના અધિકારીઓ, કર્મચારીઓ તથા સફાઈ કર્મચારીઓ બહોળી સંખ્યામાં ઉપસ્થિત રહ્યા હતા.