ફોન હેકિંગ મામલે કોંગ્રેસના નેતાઓએ રાજ ભવન સામે વિરોધ પ્રદર્શન કર્યું, ધારાસભ્યો સહિત નેતાઓની અટકાયત
ભાજપ સરકાર દ્વારા પેગાસસ માલવેર મારફતે કોંગ્રેસ નેતા રાહુલ ગાંધી તેમજ દેશના અન્ય મહાનુભાવોની ગેરકાયદેસર, ગેરબંધારણીય રીતે સેલફોન હેકિંગ બાબતે નામદાર સુપ્રિમ કોર્ટના ન્યાયાધીશ મારફતે તપાસ કરાવવાની માંગણી સાથે ગુજરાત કોંગ્રેસ પ્રદેશ અધ્યક્ષ, વિરોધપક્ષ નેતા તેમજ ધારાસભ્યો સહિત સ્થાનિક નેતાઓ અને કાર્યકરોએ રેલી યોજી રાજભવન ખાતે હલ્લાં બોલ કરી રાજ્પાલને આવેદન પત્ર આપવામાં આવ્યું હતું. ત્યારે પોલીસ દ્વારા કોંગ્રેસના અનેક ધારાસભ્યો તેમજ નેતાઓની અટકાયત કરવામાં આવી હતી.સમગ્ર દેશ અને દુનિયાને હચમચાવી નાખે તેવા ઈઝરાઈલના NSO કંપનીના પેગાસસ સોફ્ટવેર/માલવેર દ્વારા ફોન હેકિંગથી ભારતમાં વિરોધ પક્ષના નેતાઓ, શાસક પક્ષના અમુક નેતાઓ, ટોચના પત્રકારો, માનવ અધિકાર માટે લડતા કર્મશીલો, સુપ્રીમ કોર્ટના જજો તથા તેના સ્ટાફ, ચુંટણી પંચના કમિશ્નર સહિતના અંદાજે 300 જેટલા ફોન હેક કરવાની ઘટનાને ભારતની જનતાના સ્વતંત્ર જીવન જીવવાના અધિકાર ઉપર તરાપ મારનાર અને શાસન ટકાવી રાખવા માટે બંધારણ અને રાજનીતિક પ્રક્રિયા સાથે ચેડા કરવા સમાન છે.
ગુજરાતમાં વર્ષ 2017 અને 2020ની રાજ્યસભાની ચુંટણીઓ વખતે તથા વર્તમાન સમયમાં કોંગ્રેસ પક્ષના અને ભાજપના ટોચના નેતાઓના ફોન હેકિંગ દ્વારા જાસુસી થઈ રહી હોવાનો આક્ષેની શંકા સાથે કોંગ્રેસનાં ધારાસભ્યો અને નેતાઓ દ્વારા આજે વિરોધ પ્રદર્શન ગાંધીનગર ખાતે કરવામાં આવ્યો હતો અને રાજ્યપાલને આવેદન પત્ર આપવામાં આવ્યું હતું.
જેમાં જણાવાયું છે કે પેગાસસ સોફ્ટવેર/માલવેર દ્વારા ફોન ટેપીંગની ઘટના અંગે ફ્રાંસમાં પત્રકારો અને રાજકારણીઓના ફોન હેકિંગ કરવાની ઘટનાની તપાસ શરૂ કરી દેવામાં આવી છે, પરંતુ ભારતમાં આ પેગાસસ માલવેર દ્વારા અંદાજે 300 જેટલા મહાનુભાવોના ફોન હેક કરીને જાસુસ કરાઈ હોવાની ઘટનાનો સ્વીકાર કરવાની ભાજપની સરકાર ઈન્કાર કરી રહી છે. પેગાસસ દ્વારા કર્ણાટક અને મધ્યપ્રદેશની ચુંટાયેલ સરકારને ઉથલાવવામાં કોંગ્રેસના આગેવાનોના ફોન હેક કરીને જાસુસી કરાઈ હોવાની પ્રબળ શંકા છે.
કોંગ્રેસ પક્ષના પુર્વ અધ્યક્ષ રાહુલ ગાંધી, ભાજપ સરકારના બે મંત્રીઓ પ્રહલાદ જોષી અને વિષ્નોઈના ફોન હેક કરવામાં આવ્યા હોવાનું સામે આવ્યું છે. ભાજપ સરકારે પાકિસ્તાન કે ચીનની જાસુસી કરવાને બદલે પોતાના જ દેશના નાગરીકોની જાસુસી કરીને નિમ્ન કક્ષાની રાજનીતિના કારણે ભારતની આબરૂ દેશ અને દુનિયામાં ધોવાણ થયું છે. ભારતના નાગરીકોને બંધારણે આપેલો સ્વતંત્ર અને વ્યકિત્તગત જીવન વિના રોક-ટોકે જીવવાનો જે અધિકાર આપ્યો છે તેની રક્ષા કરવાને બદલે ભાજપ સરકાર આવું ગેરકાનુની રીતે ફોન ટેપીંગ કરાવી રહી છે.
ભાજપની કેંદ્ર સરકાર ફોન ટેપીંગની તપાસ સુપ્રિમ કોર્ટના ન્યાયધીશ મારફતે કરાવવામાં આવે તો કર્ણાટક અને મધ્યપ્રદેશમાં જનમત મેળવેલી સરકારો પાડવામાં અને ગુજરાતની 2017 અને 2020ની રાજ્યસભાની ચુંટણીઓ દરમિયાન કોના ફોન હેક થયા હતા તેની સાથે કયા ધારાસભ્યની કેટલા રૂપિયામાં ખરીદી થઈ હતી તે સોદાની ઘટના પણ સામે આવે તેમ છે.
અગાઉ વર્ષ 2002માં જે તે વખતના મુખ્યમંત્રી નરેન્દ્ર મોદીએ ભાજપના જ આગેવાન હરેન પંડ્યા તથા વિરોધ પક્ષના નેતાઓના ટેલીફોન ટેપ કરવાની સુચના રાજ્યના ગુપ્તચર વિભાગના અધિકારીઓને આપી હતી તે બાબત રેકોર્ડ ઉપર મૌજુદ છે. વર્ષ 2009માં નરેન્દ્ર મોદીની સુચનાથી જે તે વખતના ગૃહમંત્રી અમીત શાહે એક યુવતીની તેના બેડરૂમ સુધી જાસુસી કરવામાં આવી હતી અને તે બાબતની એક આઈ.પી.એસ. અધિકારીની વાતચીતની આખી ટેપ સી.બી.આઈ.એ મેળવી હતી. તે ઘટના પણ રેકોર્ડ ઉપર મૌજુદ છે. તેમ જ કોંગ્રેસ પક્ષના આગેવાનોની મોબાઈલની કોલ ડીટેઈલ ગેરકાનુની રીતે મેળવીને કોર્ટમાં રજૂ કરાઈ હોવાના દાખલાઓ પણ છે.
તેમણે તત્કાલીન સ્પેશિલ ડાયરેકટર, સીબીઆઈ કે જેઓ ગોધરા ટ્રેન કાંડ 2002ની તપાસ માટેની SITના હેડ હતા તેમની સામે FIR રજીસ્ટાર કરેલી. તે જ પ્રમાણે ગુજરાત કેડરના આઇપીએસ ઓફિસરો જેવા કે રાકેશ અસ્થાના અને એ. કે. શર્મા પણ આ યાદીમાં છે. તે જ બતાવે છે કે પેગાસસ સોફ્ટ્વેરને રાષ્ટ્રીય સલામતી કે જાહેર કાયદા સાથે કોઈ લેવા દેવા નથી, પરંતુ તેનો ઉપયોગ જે લોકો સરકારનો વિરોધ કરે છે અથવા જેઓની માહિતી એકઠી કરવામાં સરકારને રસ છે તેમના પર દેખરેખ રાખવા અને તેમની માહિતી એકઠી કરવા માટે કરવામાં આવે છે.
