ભારત-યુકે ફોરેન્સિક સાયન્સ અને સાયબર સિક્યોરિટી કોન્ફરન્સનો NFSU ખાતે પ્રારંભ
નેશનલ ફોરેન્સિક સાયન્સિસ યુનિવર્સિટી (NFSU), ગાંધીનગર ખાતે તા.11મી ડિસેમ્બર, 2023ના રોજ બે દિવસીય “ભારત-યુકે ફોરેન્સિક સાયન્સ અને સાયબર સિક્યુરિટી કોન્ફરન્સ”નો પ્રારંભ થયો છે. આ આંતરરાષ્ટ્રીય કોન્ફરન્સનું આયોજન બ્રિટિશ ડેપ્યુટી હાઈ કમિશન, અમદાવાદ અને નેશનલ ફોરેન્સિક સાયન્સિસ યુનિવર્સિટી (NFSU)-ગાંધીનગર દ્વારા સંયુક્ત રીતે કરવામાં આવ્યું છે. શ્રી હર્ષ સંઘવી, માનનીય ગૃહરાજ્ય મંત્રી, ગુજરાતના મુખ્ય મહેમાનપદે આ કોન્ફરન્સનો પ્રારંભ થયો હતો.
ઉદ્ઘાટન સમારોહમાં શ્રીમતી ક્રિસ્ટીના સ્કોટ, ભારત સ્થિત બ્રિટિશ ડેપ્યુટી હાઈ કમિશનર; ડૉ. જે.એમ. વ્યાસ, NFSUના કુલપતિ અને પ્રો. (ડૉ.) એસ.ઓ. જુનારે, કેમ્પસ ડાયરેક્ટર, NFSU-ગાંધીનગર કેમ્પસ સ્ટેજ પર હાજર હતા. માનનીય ગૃહરાજ્ય મંત્રી શ્રી હર્ષ સંઘવીએ જણાવ્યું કે, વર્તમાન સમયની સૌથી મોટી સમસ્યા સાયબર ક્રાઈમ છે. સાયબર ક્રાઈમ એ માત્ર આર્થિક જ નહીં, પરંતુ સામાજિક અપરાધ પણ છે.
જેને કારણે અનેક લોકોનું જીવન બરબાદ થઈ રહ્યું છે. ફોરેન્સિક સાયન્સ આવા ગુનાઓની તપાસમાં મહત્ત્વની ભૂમિકા ભજવી શકે છે. આ આંતરરાષ્ટ્રીય કોન્ફરન્સમાં યુ.કે. અને NFSUના નિષ્ણાતો સાયબર ક્રાઈમ સંબંધી જે કંઈ તારણો રજૂ કરશે તે ગુજરાત માટે પણ ખૂબ ઉપયોગી બની રહેશે. આ કોન્ફરન્સ સાયબર ક્રાઇમ અંગે લોકોમાં જાગૃતિ લાવશે અને ગુનાનો ભોગ બનનારને મદદરૂપ બનશે. નેશનલ ફોરેન્સિક સાયન્સિસ યુનિવર્સિટી (NFSU)ના કુલપતિ ડૉ. જે.એમ.વ્યાસે અધ્યક્ષીય ભાષણ કર્યું હતું. ડૉ. જે.એમ.વ્યાસે જણાવ્યું હતું કે, આ કોન્ફરન્સ વિશ્વમાં ડાર્ક વેબ, ક્રિપ્ટો કરન્સી સહિતના પડકારોનો સામનો કરવા માટે તમામ પ્રકારની અત્યાધુનિક ટેક્નોલોજીથી સજ્જ મજબૂત મિકેનિઝમની ઊભું કરવામાં સહાયરૂપ બનશે.
કરાયું છે. સાયબર ક્રાઈમના સંદર્ભમાં ગુનેગારો દ્વારા અપનાવવામાં આવતી પદ્ધતિઓ દરેક દેશમાં જુદી-જુદી જોવા મળે છે. વર્તમાન ઇન્ટરનેટના સમયમાં ગુનેગારો દુનિયાના એક ખૂણે બેસીને અન્ય દેશોમાં સાયબર ક્રાઇમ કરે છે. આવા સંજોગોમાં બે દેશોના નિષ્ણાતો પરસ્પર સહકારથી સાયબર ક્રાઈમને નિવારવા અને ગુનેગારોને શોધી કાઢવા માટે એક વ્યવસ્થિત નેટવર્ક ઊભું કરવા માટે દિશા સૂચવશે. ભારત સ્થિત બ્રિટિશ ડેપ્યુટી હાઈ કમિશનર શ્રીમતી ક્રિસ્ટીના સ્કોટે જણાવ્યું હતું કે ભારત-યુકે રોડમેપ-2030 માટે આ કોન્ફરન્સ અત્યંત ઉપયોગી સાબિત થશે.
સાયબર ક્રાઈમથી થઈ રહેલા પડકારોનો સામનો કેવી રીતે થઈ શકે અને આર્થિક સુરક્ષા અને સલામતી પુરી પાડવા શું ઉપાયો અજમાવી શકાય તે માટે ભારત અને યુ.કે.ના નિષ્ણાતો પોતાના મંતવ્યો રજૂ કરશે. ગુજરાત-રાજસ્થાન સ્થિત બ્રિટિશ ડેપ્યુટી હાઈ કમિશનર શ્રી સ્ટીફન હિકિંગ્સે જણાવ્યું હતું કે આ પ્રકારની કોન્ફરન્સ બંને દેશો વચ્ચે એક મહત્ત્વનો સેતુ બનશે. જે ગુનાની તપાસમાં રહેલાં મહત્ત્વના મુદ્દાઓ સૂચવવામાં ઉપયોગી સિદ્ધ થશે.
કોન્ફરન્સના પ્રથમ દિવસે ડૉ. એસ.એસ. આયંગર, પ્રતિષ્ઠિત પ્રોફેસર-એફઆઈયુ, યુએસએ અને એમેરિટસ પ્રોફેસર્સ, એનએફએસયુ-ભારત; ડૉ. ગૌરવ ગુપ્તા, વૈજ્ઞાનિક ‘ઈ’, ભારત સરકાર; સુશ્રી કેરોલીન લવેલ –FCN-UK; શ્રી એચ.પી. સંઘવી, અધિક નિયામક, DFS-ગુજરાત; ડો. સતીશ કુમાર, ડીન, SFS, NFSU સહિત તજજ્ઞોએ પોતાના વિચારો રજૂ કર્યા હતા. ઉદ્ઘાટન સમારોહ દરમિયાન, પ્રો. (ડૉ.) નવીન કુમાર ચૌધરી, ડીન-SCSDF, NFSU, ડૉ. દિગ્વિજયસિંહ રાઠોડ, હેડ, સેન્ટર ઓફ એક્સેલન્સ સાયબર સિક્યોરિટી સહિત વિષય નિષ્ણાતો ઉપસ્થિત રહ્યા હતા. આ કોન્ફરન્સમાં વિશ્વભરમાંથી 120થી વધુ તજજ્ઞો ભાગ લઈ રહ્યા છે.
