Gandhinagar: ખનીજ ચોરી કરતાં વાહનો સહિત 1.8 કરોડનો મુદ્દામાલ જપ્ત

ગાંધીનગર જિલ્લામાં પાછલા ઘણા સમયથી ખનીજ ચોરી અટકાવવાના પ્રયાસોના ભાગરૂપે કલેકટર શ્રી ગાંધીનગર તથા ભૂસ્તર તંત્રની ટીમ દ્વારા સરાહનીય કામગીરી કરવામાં આવી રહી છે. રાત દિવસ કડકમાં કડક ચેકિંગ દ્વારા ખનીજ માફિયાઓને તંત્રની મજબૂત ટીમ માત આપી રહી છે, આ ચેકિંગના પગલે ભૂ માફિયાઓ નવા નવા રસ્તાઓ શોધી રહ્યા ,છે પરંતુ તંત્ર તેમના દરેક પડકારને પહોંચી વળવા સજ્જ છે,ત્યારે કલેકટર શ્રીએ કડક વલણ દાખવતા જિલ્લામાં ખનીજ ચોરી કરતા ઇસમોમાં ફરી એકવાર ફફડાટ ફેલાયો છે.

જેને અનુલક્ષીને કલેક્ટરશ્રી, ગાંધીનગર મેહુલ દવેના માર્ગદર્શન અને મદદનીશ ભુસ્તરશાસ્ત્રી પ્રણવ સિંહ ની સુચના હેઠળ ગાંધીનગર જીલ્લાના મદદનીશ ભુસ્તરશાસ્ત્રીની કચેરી, ભુસ્તર વિજ્ઞાન અને ખનિજ ખાતું ની ક્ષેત્રીય ટીમ દ્વારા કરવામાં આવતી સતત બિનઅધિકૃત ખનીજ ખનન, વહન અને સંગ્રહ અન્વયેની કામગીરી દરમ્યાન સાદીરેતી તથા સાદી માટી ખનિજના બિનઅધિકૃત વહન/ખનન સબબ તા.૦૭/૦૨/૨૦૨૫ ના રોજ ગાંધીનગર જીલ્લાના સરગાસણ ચોકડી ખાતે ખનિજ ભરી વહન કરતા ત્રણ ડમ્પર વાહનો બિનઅધિકૃત વહન કરતા સીઝ કરવામાં આવેલ છે.જેમાં વાહન નં- GJ-07-VW-6259 તથા GJ-16-AU-7760 ના વાહન માલિકશ્રી દ્વારા સાદીમાટી ખનીજનું રોયલ્ટી પાસમાં દર્શાવેલ ડેસ્ટીનેશનથી અન્ય જગ્યાએ ડમ્પ કરવા અંગે બિનઅધિકૃત વહન કરતા પકડવામાં આવેલ. જ્યારે વાહન ડમ્પર નં- GJ-01-FT-4142 માં સાદીરેતી ખનીજનું રોયલ્ટી પાસ વગર બિનઅધિકૃત વહન કરતા પકડવામાં આવેલ છે.

માઈન્સ સુપરવાઈઝરશ્રી આર.આર.બુખારી દ્વારા સેક્ટર ૧૦, ગાંધીનગર ખાતેથી સાદીમાટી ખનિજનું પરમીટ/પરવાનગી વગર બિનઅધિકૃત ખનન માટે એક એક્સેવેટર મશીન સીરીયલ નં-Q401D01250 અને પાંચ ડમ્પર પૈકી વાહન નં GJ-18-BT-1451 જપ્ત કરી મશીન દ્વારા કરાયેલા સાદીમાટી ખનિજના બિનઅધિકૃત ખનનવાળા વિસ્તારની માપણી હાથ ધરવામાં આવી છે.

એજ રીતે તા.૦૯/૦૨/૨૦૨૫ ના રોજ ગાંધીનગર તાલુકાના ફતેપુરા સાબરમતી નદીપપટ્ટ વિસ્તારમાં સાદીરેતી ખનીજનું બિનઅધિકૃત ખનન/વહન અન્વયે ૦૧ જે.સી.બી. મશીન તથા ૦૧ ડમ્પર વાહન જપ્ત કરવામાં આવેલ છે. જે પૈકી જે.સીબી ચેચીસ નં.RAJ3DXS4E03491226 તથા ડમ્પર વાહન નં GJ-24-V-5221 સાદીરેતી ખનિજનું બિનઅધિકૃત ખોદકામ કરી વહન કરતા પકડવામાં આવેલ છે. જે.સી.બી.મશીન દ્વારા કરાયેલા સાદીરેતી ખનિજના બિનઅધિકૃત ખનનવાળા આ વિસ્તારની પણ માપણી હાથ ધરવામાં આવી છે.

આમ, કચેરી દ્વારા ૦૨ મશીન અને ૦૫ ડમ્પરો મળી કુલ ૦૭ વાહનો/મશીનની આશરે કુલ ૧.૮ કરોડનો મુદ્દામાલ જપ્ત કરવામાં આવેલ છે. આમ, ઉપરોક્ત જપ્ત કરેલ વાહનો/મશીનના વાહનમાલિકો વિરૂધ્ધ ગુજરાત મિનરલ (પ્રિવેન્શન ઓફ ઇલ્લીગલ માઇનીંગ, ટ્રાન્સપોર્ટેશન અને સ્ટોરેજ) નિયમો-૨૦૧૭ના નિયમો હેઠળ દંડકીય કાર્યવાહી હાથ ધરવામાં આવશે.