અમદાવાદ-ઉદયપુર વચ્ચે શરૂ થશે વંદે ભારત એક્સપ્રેસ ટ્રેન

અમદાવાદ અને ઉદયપુર વચ્ચે મુસાફરી કરતા લોકો માટે સારા સમાચાર છે. પશ્ચિમ રેલવે દ્વારા આ બે શહેરો વચ્ચે અત્યાધુનિક સુવિધાઓથી સજ્જ વંદે ભારત એક્સપ્રેસ ટ્રેન શરૂ કરવાનો નિર્ણય લેવામાં આવ્યો છે. આ ટ્રેન શરૂ થવાથી ગુજરાત અને રાજસ્થાન વચ્ચેની કનેક્ટિવિટી વધુ મજબૂત બનશે અને લાખો મુસાફરોને લાભ થશે.

આ ટ્રેનમાં આઠ એસી ચેર કાર કોચ હશે, જેમાં આરામદાયક બેઠક વ્યવસ્થા અને હાઈ સ્પીડ જેવી સુવિધાઓ ઉપલબ્ધ હશે. અમદાવાદથી આ ટ્રેન હિંમતનગર થઈને ઉદયપુર જશે અને અઠવાડિયામાં છ દિવસ દોડશે (મંગળવારે બંધ રહેશે). ઉદયપુરથી ટ્રેન સવારે 6:10 વાગ્યે ઉપડશે અને 10:25 વાગ્યે અમદાવાદ પહોંચશે. હિંમતનગરમાં તેનો બે મિનિટનો સ્ટોપ રહેશે. અમદાવાદના અસારવા સ્ટેશનથી ટ્રેન સાંજે 5:45 વાગ્યે રવાના થશે અને રાત્રે 10:00 વાગ્યે ઉદયપુર પહોંચશે. આ નવી ટ્રેનથી મુસાફરોનો સમય બચશે અને તેમને આધુનિક મુસાફરીનો અનુભવ મળશે.