ગાંધીનગર જિલ્લામાં એલપીજી ગેસનો પૂરતો જથ્થો ઉપલબ્ધ,બિનજરૂરી સંગ્રહખોરી ન કરવા જિલ્લા પુરવઠા અધિકારીનો અનુરોધ

ગાંધીનગર જિલ્લાના નાગરિકોને એલપીજી ગેસના પુરવઠા બાબતે જિલ્લા પુરવઠા અધિકારીની કચેરી ગાંધીનગર દ્વારા જણાવવામાં આવ્યું છે કે, જિલ્લામાં કાર્યરત તમામ ગેસ વિતરકો પાસે રાંધણ ગેસના બોટલનો પૂરતો જથ્થો ઉપલબ્ધ છે. વેટિંગ લિસ્ટના નિયમો અનુસાર દરેક ગ્રાહકને સમયસર ગેસ સિલિન્ડર મળી રહે તેવી વ્યવસ્થા સુનિશ્ચિત કરવામાં આવી છે.

વધુમાં જણાવ્યા અનુસાર, હાલમાં IOCL, BPCL, HPCL જેવી મુખ્ય ઓઈલ કંપનીઓની વેબસાઈટમાં કેટલીક ટેકનિકલ ખામીઓ જોવા મળી રહી છે. આ બાબતે વહીવટી તંત્ર ગેસ કંપનીઓના સતત સંપર્કમાં છે. કંપનીઓ પાસે પણ પૂરતો સ્ટોક ઉપલબ્ધ હોવાથી ગ્રાહકોએ કોઈપણ પ્રકારની અફવાઓથી દોરવાઈને બિનજરૂરી દોડધામ કે ગેસ સિલિન્ડરની સંગ્રહખોરી ન કરવા નમ્ર અપીલ કરવામાં આવી છે.

ગેસના વિતરણમાં પારદર્શિતા જળવાઈ રહે અને કાળાબજારી જેવી પ્રવૃત્તિઓ ન થાય તે માટે તંત્ર દ્વારા તપાસની કામગીરી વધુ સઘન બનાવવામાં આવી છે. જો કોઈ પણ સ્તરે અનિયમિતતા જણાશે તો કડક કાયદેસરની કાર્યવાહી કરવામાં આવશે. ગ્રાહકોને ધૈર્ય રાખવા અને વહીવટી તંત્રને સહકાર આપવા વિનંતી છે.