આગામી 10 ઓગસ્ટ સુધી દેશના અનેક રાજ્યોમાં ભારે વરસાદની આગાહી

દેશભરમાં દક્ષિણ-પશ્ચિમ ચોમાસું ફરી સક્રિય થયું છે, જેના કારણે અનેક વિસ્તારોમાં ભારે વરસાદ જોવા મળી રહ્યો છે. આજે, 4 ઓગસ્ટના રોજ દિલ્હીમાં પણ જોરદાર પવન અને ગાજવીજ સાથે વરસાદ પડ્યો હતો. હવામાન વિભાગ (IMD) એ આગામી 10 ઓગસ્ટ સુધી માટે અલગ-અલગ રાજ્યોમાં વરસાદની આગાહી કરી છે.

ક્યાં ક્યાં પડશે ભારે વરસાદ?

• ઉત્તર ભારત: આગામી ત્રણ દિવસ એટલે કે 7 ઓગસ્ટ સુધી હિમાચલ પ્રદેશ, ઉત્તરાખંડ અને ઉત્તર પ્રદેશમાં ભારેથી અતિભારે વરસાદની શક્યતા છે.
• દક્ષિણ ભારત: કેરળ અને તમિલનાડુના ઘાટ વિસ્તારોમાં 5 અને 6 ઓગસ્ટે અતિભારે વરસાદ (heavy to very heavy rainfall) પડી શકે છે.
• પૂર્વ અને પૂર્વોત્તર ભારત: આગામી સાત દિવસ સુધી આ વિસ્તારોમાં પણ ભારે વરસાદની આગાહી છે.
• મહારાષ્ટ્ર: મરાઠવાડામાં 6 અને 7 ઓગસ્ટ, કોંકણ અને ગોવામાં 7 અને 8 ઓગસ્ટ અને મધ્ય મહારાષ્ટ્રમાં 8 ઓગસ્ટના રોજ ભારે વરસાદની શક્યતા છે.

ગુજરાતમાં ક્યાં રહેશે વરસાદી માહોલ?

હવામાન વિભાગ મુજબ, ગુજરાતમાં 5 થી 8 ઓગસ્ટ દરમિયાન અનેક જિલ્લાઓમાં હળવાથી મધ્યમ વરસાદ પડી શકે છે. ખાસ કરીને, બનાસકાંઠા, પાટણ, સાબરકાંઠા, મહેસાણા, અરવલ્લી, ગાંધીનગર, મહીસાગર, દાહોદ, પંચમહાલ, વડોદરા, આણંદ, ભરૂચ, છોટા ઉદેપુર, નર્મદા, સુરત, તાપી, ડાંગ, નવસારી અને વલસાડમાં ઘણી જગ્યાએ વરસાદ જોવા મળશે. સૌરાષ્ટ્ર-કચ્છના મોરબી, સુરેન્દ્રનગર, રાજકોટ, જામનગર, દેવભૂમિ દ્વારકા, પોરબંદર, જૂનાગઢ, અમરેલી, ગીર સોમનાથ, ભાવનગર, બોટાદ અને કચ્છમાં પણ છૂટાછવાયા વરસાદની શક્યતા છે.