ગાંધીનગરમાં ઠગાઈનો નવો કિસ્સો: વિદેશી નોકરીના નામે છેતરપિંડી, પોલીસ તપાસ શરૂ

ગાંધીનગર: વિદેશમાં નોકરી અને સ્થાયી થવાના સપના જોતા યુવાનોને છેતરપિંડીનો ભોગ બનાવતી ઘટનાઓ વધી રહી છે. ગાંધીનગર નજીકના વાવોલ ગામના એક યુવાન અને તેના ત્રણ મિત્રો સાથે આવો જ કિસ્સો બન્યો છે. અમદાવાદના એક એજન્ટે તેમને વિદેશમાં વર્ક પરમિટ વિઝા અપાવવાના બહાને ₹14 લાખની છેતરપિંડી કરી છે. આ મામલે સેક્ટર-21 પોલીસ સ્ટેશનમાં ફરિયાદ દાખલ કરવામાં આવી છે અને વધુ તપાસ ચાલી રહી છે.

વાવોલમાં રહેતા રાકેશ નટવરલાલ નાગર અને તેમના મિત્રો ભવનેશ જોષી, સંદિપ જોષી અને નિશાંતકુમાર પટેલે અમદાવાદના સેટેલાઈટ વિસ્તારમાં રહેતા ઓનીલકુમાર મલાનીનો સંપર્ક કર્યો હતો. ઓનીલકુમારે તેમને જર્મની અને બાદમાં સ્લોવાકિયામાં વર્ક પરમિટ વિઝા અપાવવાનું વચન આપ્યું હતું. આ માટે તેઓએ કુલ ₹14 લાખ ચૂકવ્યા હતા, જેમાં રોકડ અને ઓનલાઈન ટ્રાન્સફર દ્વારા ચૂકવાયેલી રકમનો સમાવેશ થાય છે.
પ્રથમ, વિઝા ફાઈલ માટે ₹2 લાખ અને પછી જર્મની વિઝાનું કામ પૂરું કરવા માટે મુંબઈ જવાનો ખર્ચ ₹1 લાખનો થયો હતો. જોકે, જર્મનીના વિઝા રિજેક્ટ થયા બાદ એજન્ટે સ્લોવાકિયાના વિઝાનું વચન આપ્યું હતું, પરંતુ તે પછી તેનો કોઈ સંપર્ક થયો ન હતો. એજન્ટના મોબાઈલ નંબર બંધ આવતા હતા અને તેના ઘરે જઈને જોતા મકાન બંધ મળ્યું હતું. પડોશીઓ પાસેથી જાણવા મળ્યું કે તે ગ્વાલિયર ગયો છે. આ ઘટના બાદ યુવાનોએ પોલીસનો સંપર્ક કર્યો છે અને પોલીસે ગુનો નોંધીને એજન્ટની શોધખોળ શરૂ કરી છે.