નોરા ફતેહી જેવી દેખાવા પત્નીને ત્રાસ આપનાર પતિ સામે નોંધાઈ ફરિયાદ

ગાઝિયાબાદ: ઉત્તર પ્રદેશના ગાઝિયાબાદમાં એક ચોંકાવનારો કિસ્સો સામે આવ્યો છે, જ્યાં એક પરિણીત મહિલાએ પોતાના પતિ સામે મહિલા પોલીસ સ્ટેશનમાં ગંભીર ફરિયાદ નોંધાવી છે. મહિલાનો આરોપ છે કે તેનો પતિ, જે એક સરકારી ફિઝિકલ એજ્યુકેશન ટીચર છે, તેને બોલિવૂડ અભિનેત્રી નોરા ફતેહી જેવી દેખાવા માટે મજબૂર કરતો હતો. જો તે દરરોજ 3 કલાક કસરત ન કરી શકે તો તેને ભૂખી રાખવામાં આવતી હતી. આ સાથે જ પતિ અને તેના પરિવાર પર 76 લાખથી વધુ દહેજ લીધા બાદ પણ વધુ દહેજ માટે શારીરિક અને માનસિક ત્રાસ આપવાનો આરોપ છે.

ફરિયાદમાં જણાવ્યા અનુસાર, મહિલાના લગ્ન માર્ચ 2025માં થયા હતા. લગ્ન પછી તરત જ તેના પતિ અને સાસરિયાઓએ જમીન અને રોકડ જેવી વસ્તુઓની માંગણી શરૂ કરી. પતિ સતત કહેતો કે તેને નોરા ફતેહી જેવી સુંદર પત્ની મળી શકી હોત. તે માત્ર એટલું જ નહીં, પણ દરરોજ 3 કલાક કસરત કરવા દબાણ કરતો. જો મહિલા થાક કે બીમારીને કારણે કસરત ન કરી શકે તો તેને ભૂખી રાખવામાં આવતી હતી.

સૌથી ગંભીર બાબત એ છે કે જ્યારે મહિલા ગર્ભવતી હતી, ત્યારે પણ તેને હેરાન કરવામાં આવી. તેના સાસરિયાઓએ તેને એવું ખાવાનું આપ્યું જેના કારણે તેની તબિયત બગડી અને જુલાઈ 2025માં ગર્ભપાત થયો. ડોક્ટરોએ આ માટે શારીરિક અને માનસિક ત્રાસ તેમજ ખરાબ ખોરાકને જવાબદાર ગણાવ્યો. આ ઘટના બાદ મહિલા તેના પિયર ચાલી ગઈ, પરંતુ ત્યાં પણ તેના પતિ અને સાસરિયાઓએ વિડીયો કોલ પર દુર્વ્યવહાર ચાલુ રાખ્યો અને છૂટાછેડાની ધમકી આપી. જ્યારે તે ફરી સાસરે ગઈ, તો તેને ઘરમાં પ્રવેશ ન કરવા દીધો. મહિલાએ પતિ, સાસુ, સસરા અને ભાભી સામે દહેજ ઉત્પીડન, ઘરેલુ હિંસા અને ગર્ભપાત કરાવવાના ગંભીર આરોપો લગાવ્યા છે. પોલીસે ફરિયાદ નોંધીને તપાસ શરૂ કરી છે અને મેડિકલ રિપોર્ટ સહિતના પુરાવા એકત્ર કરી રહી છે.