જાહેર વિતરણ વ્યવસ્થા વધુ પારદર્શક બનાવવા રાજ્ય સરકારનો મહત્વનો નિર્ણય

જાહેર વિતરણ વ્યવસ્થા હેઠળના લાભાર્થીઓને,  ગુણવત્તા યુક્ત અને પૂરતો અનાજનો જથ્થો મળી રહે તે સુનિશ્ચિત કરવા અને ડોર સ્ટેપ ડિલિવરી પ્રણાલીમાં વધુ પારદર્શિતા લાવવા માટે, આજે ગાંધીનગરમાં કલેક્ટર કચેરી ખાતે અન્ન નાગરિક પુરવઠા નિયામકની કચેરી, ગાંધીનગરના સંયુક્ત નિયામક શ્રી ચેતન ગાંધી અને અધિક નિવાસી કલેક્ટર સુશ્રી નિશા શર્માના અધ્યક્ષ સ્થાને, ગ્રામ્ય તથા શહેરી કક્ષાએ તકેદારી સમિતિના ઓછામાં ઓછા બે સભ્યોને વેરિફિકેશન લેવા અંગેની સમીક્ષા બેઠક યોજવામાં આવી હતી. વાજબી ભાવની દુકાન ખાતે ડોર સ્ટેપ ડિલિવરીના માધ્યમથી આવશ્યક ચીજ વસ્તુઓનો જથ્થો પહોંચે તે સમયે, ગ્રામ્ય તકેદારી સમિતિના 80% સભ્યોના બાયોમેટ્રિક વેરિફિકેશન લેવા તથા આવેલા જથ્થાની ગુણવત્તાની  ખરાઈ કાર્ડધારકોની હાજરીમાં કરવાનો રાજ્ય સરકારે નિર્ણય કર્યો છે.
અન્ન અને નાગરિક પુરવઠા નિયામકની કચેરી,

ગાંધીનગરના સંયુક્ત નિયામકશ્રી ચેતન ગાંધીએ જણાવ્યું હતું કે, વાજબી ભાવની દુકાનો પર ગોડાઉનમાંથી આવતા આવશ્યક ચીજ વસ્તુના જથ્થા માટે ગ્રામ્ય તકેદારી સમિતિના ઓછામાં ઓછા બે સભ્યો દ્વારા જથ્થાની ડોર સ્ટેપ ડિલિવરી થાય ત્યારે, બાયોમેટ્રિક / ઓટીપી બેઝડ સિસ્ટમથી જથ્થાની ચકાસણી કરીને સહી લેવાની પ્રથા અમલમાં મૂકવા માટે,  ગાંધીનગરના દહેગામ ખાતેથી રાજ્યના પ્રથમ પાયલોટ પ્રોજેક્ટનો આરંભ થશે.  પાંચ થી ૧૫ ડિસેમ્બર વચ્ચે ટ્રાયલ શરૂ થશે.  ગુજરાત સરકાર તરફથી નાગરિકોને ઉત્તમ સેવાઓ પારદર્શિતાથી મળી રહે એ જરૂરી છે.
તેમણે ઉમેર્યું હતું કે, ગાંધીનગરમાં 340 વાજબી ભાવની દુકાનો આવેલી છે. પ્રથમ પાયલોટ પ્રોજેક્ટનું સુચારુ રૂપે આયોજન કરી, આવશ્યક ચીજ વસ્તુના જથ્થાના વિતરણ સાથે સંકળાયેલા તમામને સહયોગ આપવા તેમણે અપીલ કરી હતી. તેમણે આવશ્યક ચીજ વસ્તુના જથ્થાના વિતરણ સાથે સંકળાયેલા તમામ સભ્યોના સૂચનો અને પ્રશ્નો પણ સાંભળ્યા હતા.    આ બેઠકમાં જિલ્લા પુરવઠા અધિકારીશ્રી, ગાંધીનગર જિલ્લાના તમામ મામલતદાર અને નાયબ મામલતદાર ઉપસ્થિત રહ્યા હતા.