ગાંધીનગર મહાનગરપાલિકા સામાન્ય ચૂંટણી-૨૦૨૬મા નોંધાયું સરેરાશ ૫૯.૨૫% મતદાન

ગાંધીનગરના ૧,૫૪,૦૪૫ મતદારોએ કર્યું મતદાન: સૌથી વધુ વોર્ડ-૪મા કુલ ૭૪.૭૮% મતદાન નોંધાયું
ગાંધીનગર તા.૧૧ ઓક્ટોબર-
ગાંધીનગર મહાનગરપાલિકા સામાન્ય ચૂંટણી-૨૦૨૬ અંતર્ગત સવારે ૦૭:૦૦ થી સાંજ ૧૮:૦૦ કલાક સુધી યોજાયેલી મતદાન પ્રક્રિયા શાંતિપૂર્ણ માહોલમાં સંપન્ન થઈ છે, જેમાં કુલ ૫૯.૨૫% મતદાન નોંધાયું છે. આ ચૂંટણીમાં ગાંધીનગર મહાનગરપાલિકા વિસ્તારના મતદારોએ લોકશાહીના આ મહાપર્વમાં ઉત્સાહભેર ભાગ લીધો હતો.
ચૂંટણી પંચના આંકડાઓ મુજબ, ગાંધીનગર મહાનગરપાલિકા વિસ્તારમાં કુલ ૨,૫૯,૯૮૫ મતદારો નોંધાયેલા હતા, જેમાંથી ૧,૩૨,૫૭૦ પુરુષો, ૧,૨૭,૪૦૬ સ્ત્રીઓ અને ૯ અન્ય મતદારોનો સમાવેશ થાય છે. આ કુલ મતદારોમાંથી સવારે ૦૭:૦૦ થી સાંજે ૧૮:૦૦ વાગ્યા સુધીમાં કુલ ૧,૫૪,૦૪૫ મતદારોએ પોતાના મતાધિકારનો ઉપયોગ કર્યો હતો, જેમાં ૮૨,૬૭૪ પુરુષ અને ૭૧,૩૭૧ સ્ત્રી મતદારો સામેલ છે. એકંદરે મતદાનની ટકાવારી જોઈએ તો, પુરુષોનું મતદાન ૬૨.૩૬% અને સ્ત્રીઓનું મતદાન ૫૬.૦૨% નોંધાયું છે.

વોર્ડવાર મતદાનની વિગતો જોઈએ તો, વોર્ડ-૧ માં ૭૧.૨૨%, વોર્ડ-૨ માં ૬૯.૭૦%, વોર્ડ-૩ માં ૫૯.૨૬%, વોર્ડ-૪ માં ૭૪.૭૮%, વોર્ડ-૫ માં ૪૮.૬૩%, વોર્ડ-૬ માં ૬૧.૯૮%, વોર્ડ-૭ માં ૬૬.૩૭%, વોર્ડ-૮ માં ૫૧.૮૮%, વોર્ડ-૯ માં ૫૧.૫૪%, વોર્ડ-૧૦ માં ૫૦.૮૦%, અને વોર્ડ-૧૧ માં ૫૭.૬૯% મતદાન નોંધાયું હતું. સમગ્ર ચૂંટણી દરમિયાન નાગરિકોમાં મતદાનને લઈને ભારે ઉત્સાહ જોવા મળ્યો હતો. હાલ તમામ વોર્ડના ઇલેક્ટ્રોનિક વોટિંગ મશીન્સને સુરક્ષિત સ્ટ્રોંગ રૂમમાં રાખવામાં આવ્યા છે, અને આગામી તા.૧૩ ઓક્ટોબરના રોજ મતગણતરી હાથ ધરવામાં આવશે.”