ગાંધીનગરમાં લોકશાહીના પર્વનો શંખનાદ: અંદાજે ૧૦૦૦ શાળાઓના ૮૦,૦૦૦ થી વધુ વિદ્યાર્થીઓએ લીધા મતદાનના શપથ

સ્થાનિક સ્વરાજ્યની આગામી સામાન્ય અને પેટા ચૂંટણીઓમાં જન-જનની ભાગીદારી સુનિશ્ચિત કરવા માટે ગાંધીનગર જિલ્લા વહીવટી તંત્ર દ્વારા કમર કસવામાં આવી છે. જિલ્લા શિક્ષણાધિકારીશ્રીની કચેરીના માર્ગદર્શન હેઠળ ૧૩ એપ્રિલ ૨૦૨૬થી જિલ્લાની તમામ શાળાઓમાં SVAP (State Voters Awareness Programme) નો ભવ્ય પ્રારંભ કરવામાં આવ્યો છે.

આજથી શરૂ થયેલા આ અભિયાન અંતર્ગત ગાંધીનગર જિલ્લાની અંદાજિત ૧૦૦૦ જેટલી સરકારી, ગ્રાન્ટેડ અને ખાનગી શાળાઓમાં વિશેષ સભાઓનું આયોજન કરવામાં આવ્યું હતું. સવારની પ્રાર્થના સભામાં આચાર્યશ્રીઓ, શિક્ષકો અને સ્ટાફગણ સહિત ૮૦,૦૦૦ થી વધુ વિદ્યાર્થીઓએ સામૂહિક રીતે મતદાન જાગૃતિના શપથ લીધા હતા. ઉપસ્થિત સૌએ આગામી ૨૬ એપ્રિલના રોજ યોજાનાર ચૂંટણીમાં નિર્ભીક અને પ્રલોભન મુક્ત મતદાન કરવા તથા અન્યને પ્રેરિત કરવા માટે પ્રતિજ્ઞા લીધી હતી.

શાળાઓમાં કાર્યરત ઇલેક્ટોરલ લિટરસી ક્લબ (ELC) ના નોડલ શિક્ષકો દ્વારા વિદ્યાર્થીઓને લોકશાહીના મૂલ્યો અને ‘એક મતના મહત્વ’ વિશે વિસ્તૃત સમજ પૂરી પાડવામાં આવી હતી. આ અભિયાનનો મુખ્ય હેતુ વિદ્યાર્થીઓ મારફતે તેમના વાલીઓ અને આસપાસના પરિવારો સુધી મતદાનનો સંદેશ પહોંચાડવાનો છે.

અભિયાનના પ્રથમ દિવસે જ જબરો ઉત્સાહ જોવા મળ્યો છે. આગામી દિવસોમાં પૂર્વ નિર્ધારિત કેલેન્ડર મુજબ જિલ્લાની શાળાઓમાં નિબંધ સ્પર્ધા, વક્તૃત્વ સ્પર્ધા અને ચિત્રકલા જેવી વિવિધ પ્રવૃત્તિઓ દ્વારા મતદાર જાગૃતિનો આ પ્રવાહ અવિરત ચાલુ રાખવામાં આવશે.