અડાલજ ગાંધીનગર વચ્ચેની યુનિવર્સિટીમાં ઝગડાની ઘટનાને રેગિંગ માં ખપાવી

અડાલજ ગાંધીનગર વચ્ચે આવેલી એક યુનિવર્સિટી કેમ્પસમાં અભ્યાસ કરતા વિદ્યાર્થીઓએ અડાલજ પોલીસ મથકમાં રેગીંગની એક અરજી કરી હતી. કુલ ચાર વિદ્યાર્થીએ પોતાને એક સિનિયર વિદ્યાર્થીએ મારમારી રેગીંગ કર્યુ હોવાની આ ફરિયાદ હતી. જેમાં તેઓએ પોતાની સુરક્ષાને લઈને ખતરો અનુભવી રહ્યા હોવાનું, સિનિયર વિદ્યાર્થી વિરૂધ્ધ કાયદાકીય પગલા લેવાનુ અને યોગ્ય સુરક્ષા પુરી પાડવાની માંગ કરવામાં આવી હતી. આ ઘટના બાદ અડાલજ પોલીસ હરકતમાં આવી હતી.
પોલીસે જે વિદ્યાર્થીએ રેગીંગ કર્યુ હતુ તે વિદ્યાર્થી અને કથિત ભોગ બનનાર ચાર વિદ્યાર્થીઓને નિવેદન માટે પોલીસ સ્ટેશન પર બોલાવ્યા હતા. પોલીસની તપાસમાં કાંઇક અલગ જ ઘટના પ્રકાશમાં આવી હતી. યુનિવર્સિટી કેમ્પસમાં મારપીટની ઘટનાને આ વિદ્યાર્થીઓએ રેગીંગ સાથે સરખાવી હતી. પોલીસની તપાસમાં બંને પક્ષે કોઈ કોમેન્ટ બાબતે મામલો બિચક્યો હતો. જેમાં બંને પક્ષે મારપીટ થઈ હતી. આ ઘટના બાદ ચાર વિદ્યાર્થીઓ બદલો લેવા માટે માર મારનાર વિદ્યાર્થીને સોરી બોલાવવા ઇચ્છતા હતા. તેઓ પૈકી કોઇ એક વિદ્યાર્થીએ પોતાના સંપર્કો મારફત સુપ્રિમ કોર્ટના એક વકિલ નો સંપર્ક કર્યો હતો અને પોતાની સાથે બનેલી ઘટના અંગે વાતચીત કરી હતી. આ વાતચીત બાદ સુપ્રિમ કોર્ટના વિકલ ના એક જુનિયર વકિલે વિદ્યાર્થીઓને રેગીંગ થયુ હોવાની એક અરજી ટાઇપ કરી આપી હતી. જે અરજી તેઓએ પોલીસને આપી હતી. આ હકિકત બહાર આવતા પોલીસ પણ ચોંકી ઉઠી હતી. યુનિવર્સિટી કેમ્પસમાં બે વિદ્યાર્થી પક્ષ વચ્ચે થયેલી માથાકુટ ની ઘટનાને રેગીંગ માં ખપાવવાનો પ્રયાસ થયો હતો. જોકે, પોલીસે મામલો થાળે પાડવા માથાકુટ કરનાર વિદ્યાર્થી પાસે સોરી બોલાવડાવતા મામલો થાળે પડયો હતો અને રેગીંગ કરનાર વિદ્યાર્થીઓએ પોતે કરેલી રેગીંગ ની અરજી પરત ખેંચી હતી.