ગાંધીનગર જિલ્લામાં મતદાન જાગૃતિનો ગુંજારવ

આગામી તારીખ ૨૬/૦૪/૨૦૨૬ના રોજ યોજાનાર સ્થાનિક સ્વરાજ્યની ચૂંટણીમાં નાગરિકોની મહત્તમ ભાગીદારી સુનિશ્ચિત કરવા માટે રાજ્ય ચૂંટણી આયોગના SVAP (State Voters Awareness Programme) હેઠળ ગાંધીનગર જિલ્લામાં પ્રચાર-પ્રસારની પ્રવૃત્તિઓ વેગવંતી બની છે. આ અભિયાનના ભાગરૂપે આજે જિલ્લાની વિવિધ માધ્યમિક અને ઉચ્ચત્તર માધ્યમિક શાળાઓના વિદ્યાર્થીઓએ કલા અને સંવાદના માધ્યમથી મતદાર જાગૃતિનો અનોખો સંદેશ પાઠવ્યો હતો.

લોકો સુધી કોઈ પણ ગંભીર સંદેશ પહોંચાડવા માટે દ્રશ્ય-શ્રાવ્ય માધ્યમ સૌથી પ્રભાવશાળી હોય છે. આ ઉદ્દેશ્ય સાથે વિદ્યાર્થીઓની નાની-નાની ટુકડીઓએ જાહેર સ્થળો અને શાળાની આસપાસના વિસ્તારોમાં આકર્ષક શેરી નાટકો ભજવ્યા હતા. ધારદાર સંવાદો અને હળવી શૈલીમાં રજૂ થયેલા આ નાટકોમાં ‘પ્રલોભન મુક્ત મતદાન’ પર વિશેષ ભાર મૂકવામાં આવ્યો હતો, જેમાં નાગરિકોને કોઈપણ ભેટ-સોગાદ કે લાલચમાં આવ્યા વગર નૈતિક મતદાન કરવા અપીલ કરાઈ હતી. આ ઉપરાંત, ‘એક મતની તાકાત’ અને EVM અંગેની અફવાઓથી દૂર રહી નિર્ભયપણે મતદાન કરવાના વિષયોને પણ સચોટ રીતે વણી લેવામાં આવ્યા હતા.

શેરી નાટકોની સાથે વિદ્યાર્થીઓએ સ્થાનિક લોકબોલી અને પ્રચલિત ઢાળમાં તૈયાર કરેલા મતદાન જાગૃતિ ગીતોની પ્રસ્તુતિ કરી હતી. ઢોલ, મંજીરા અને ખંજરી જેવા પરંપરાગત વાજિંત્રોના તાલે “મતદાન કરવા ચાલો રે…”, “વોટ આપવા જરૂર જજો” અને “જાગૃત મતદાર દેશનો આધાર” જેવા ગીતોએ ગ્રામજનોમાં ભારે આકર્ષણ જમાવ્યું હતું. બાળકોની આ કલાત્મક રજૂઆતને જોવા માટે મોટી સંખ્યામાં લોકો એકઠા થયા હતા અને તાળીઓના ગડગડાટથી વિદ્યાર્થીઓના ઉત્સાહને વધાવ્યો હતો.

જ્યારે નાના બાળકો રસ્તા પર ઉભા રહીને દેશના ઉજ્જવળ ભવિષ્ય માટે વડીલો પાસે મતદાનની માંગ કરે છે, ત્યારે તેની સીધી અસર વાલીઓના હૃદય પર પડે છે. આ કાર્યક્રમ દ્વારા સમાજમાં એક સકારાત્મક નૈતિક વાતાવરણ ઊભું થયું છે. ઉલ્લેખનીય છે કે, આ જાગૃતિ અભિયાનના આગામી ચરણમાં આવતીકાલે તારીખ ૨૨ એપ્રિલના રોજ જિલ્લામાં ભવ્ય જન જાગૃતિ રેલી અને માનવ સાંકળનું આયોજન કરવામાં આવ્યું છે, જે આગામી ચૂંટણીમાં ઐતિહાસિક મતદાન તરફનું એક મહત્વનું કદમ સાબિત થશે.