સ્થાનિક સ્વરાજ્યની ચૂંટણી અંતર્ગત ગાંધીનગર જિલ્લામાં EVM ડિસ્પેચિંગની કામગીરી સંપન્ન
આગામી ૨૬ એપ્રિલના રોજ યોજાનારી સ્થાનિક સ્વરાજ્યની ચૂંટણીના સુચારુ સંચાલન માટે ગાંધીનગર વહીવટી તંત્ર દ્વારા આખરી ઓપ આપવામાં આવ્યો છે. આ ચૂંટણી પ્રક્રિયાના ભાગરૂપે આજરોજ સવારથી જ ગાંધીનગર, કલોલ, માણસા અને દહેગામ ખાતે જડબેસલાક પોલીસ બંદોબસ્ત વચ્ચે EVM મશીન અને અન્ય ચૂંટણી સામગ્રીના ડિસ્પેચિંગ તેમજ રિસીવિંગની કામગીરી હાથ ધરવામાં આવી હતી.
ચૂંટણી અધિકારીઓના સીધા માર્ગદર્શન હેઠળ જિલ્લાના ચારેય તાલુકા મથકો પર વહેલી સવારથી જ પોલિંગ સ્ટાફ અને સુરક્ષાકર્મીઓની અવરજવર શરૂ થઈ ગઈ હતી. સંવેદનશીલ ગણાતી આ પ્રક્રિયાને ધ્યાને રાખીને લોખંડી પોલીસ બંદોબસ્ત ગોઠવવામાં આવ્યો હતો. દરેક સેન્ટર પર ઝોનલ ઓફિસરો દ્વારા પ્રિસાઇડિંગ ઓફિસરોને EVM અને VVPAT મશીનોની ફાળવણી કરવામાં આવી હતી, જેની સંપૂર્ણ ચકાસણી બાદ સ્ટાફ નિર્ધારિત મતદાન મથકો તરફ રવાના થયો હતો.
વહીવટી તંત્ર દ્વારા વાહનવ્યવહાર માટે ખાસ એસ.ટી. બસોની વ્યવસ્થા કરવામાં આવી હતી જેથી દરેક બૂથ સુધી સમયસર સામગ્રી પહોંચાડી શકાય. આ સાથે જ મતદાન બાદ મશીનો પરત મેળવવા માટે રિસીવિંગ સેન્ટરો પર પણ ખાસ વ્યવસ્થા ઊભી કરવામાં આવી છે. સમગ્ર ગાંધીનગર જિલ્લામાં શાંતિપૂર્ણ અને નિષ્પક્ષ રીતે ચૂંટણી પ્રક્રિયા પૂર્ણ થાય તે માટે તંત્ર દ્વારા તમામ તૈયારીઓ પૂર્ણ કરી દેવામાં આવી છે.
