ગાંધીનગર જિલ્લામાં સ્થાનિક સ્વરાજ્યની ચૂંટણીનું મતદાન શાંતિપૂર્ણ માહોલમાં સંપન્ન

ગાંધીનગર જિલ્લામાં સ્થાનિક સ્વરાજ્યની સંસ્થાઓની સામાન્ય ચૂંટણી-2026 અંતર્ગત જિલ્લા પંચાયત, તાલુકા પંચાયત અને નગરપાલિકા માટેનું મતદાન અત્યંત શાંતિપૂર્ણ અને ઉત્સાહભર્યા વાતાવરણમાં પૂર્ણ થયું છે. સમગ્ર જિલ્લામાં ક્યાંય પણ અનિચ્છનીય બનાવ વગર લોકશાહીનો પર્વ ઉજવાયો હતો. મતદાન પ્રક્રિયા પૂર્ણ થતાની સાથે જ તમામ EVM મશીનોને ચુસ્ત પોલીસ બંદોબસ્ત હેઠળ સુરક્ષિત રીતે નક્કી કરવામાં આવેલા સ્ટ્રોંગ રૂમમાં ખસેડવામાં આવ્યા છે.

જિલ્લા ચૂંટણી તંત્ર દ્વારા મળેલી માહિતી મુજબ, જિલ્લા અને તાલુકા પંચાયત માટે કુલ 760 મતદાન મથકો અને નગરપાલિકા માટે 132 મતદાન મથકો પર વહેલી સવારથી જ મતદારોની કતારો જોવા મળી હતી. બેઠકોની વિગતવાર વાત કરીએ તો, નગરપાલિકાની 18 બેઠકો, તાલુકા પંચાયતની 76 બેઠકો અને જિલ્લા પંચાયતની 28 બેઠકો માટે આ ચૂંટણી યોજાઈ હતી. જેમાંથી નગરપાલિકાની 4, તાલુકા પંચાયતની 6 અને જિલ્લા પંચાયતની 3 બેઠકો પર ઉમેદવારો બિનહરીફ જાહેર થયા હતા. આ બેઠકો બાદ કરતાં બાકીની તમામ બેઠકો પર રસાકસીભર્યો જંગ ખેલાયો હતો અને તમામ ઉમેદવારોનું રાજકીય ભવિષ્ય હવે EVMમાં કેદ થયું છે.

જિલ્લાના વિવિધ તાલુકાઓના ગ્રામ્ય વિસ્તારોમાં મતદાન પૂર્ણ થયા બાદ વહીવટી તંત્ર દ્વારા લોખંડી બંદોબસ્ત વચ્ચે મતદાન પેટીઓ અને EVM મશીનોને સ્ટ્રોંગ રૂમ ખાતે પહોંચાડવાની કામગીરી સફળતાપૂર્વક પૂર્ણ કરવામાં આવી હતી. હવે તમામની નજર આગામી 28 એપ્રિલ પર ટકેલી છે, જ્યારે મતગણતરી હાથ ધરવામાં આવશે અને ઉમેદવારોના ભાવિનો ફેંસલો જાહેર થશે.