ગાંધીનગર ખાતે યોજાયેલ જિલ્લા કક્ષાના ભરતીમેળામાં ૧૯૭ યુવાનોની પ્રાથમિક પસંદગી

જિલ્લા રોજગાર વિનિમય કચેરી, ગાંધીનગર દ્વારા તા.૧૫/૦૫/૨૦૨૬ ના રોજ સવારે ૧૦:૦૦ કલાકે ગેઝિઆ એસોસીએશન હોલ, બી-૨૩/૨/૧-૨, જી.આઈ.ડી.સી. ઈલેક્ટ્રોનિક એસ્ટેટ, સેક્ટર-૨૫, ગાંધીનગર ખાતે જિલ્લા કક્ષાનો રોજગાર ભરતીમેળો સફળતાપૂર્વક યોજાયો હતો. આ રોજગાર ભરતીમેળામાં કુલ ૨૫ જેટલી પ્રતિષ્ઠિત કંપનીઓએ ભાગ લીધો હતો. ભરતીમેળા દરમિયાન વિવિધ ટેકનિકલ અને બિન-ટેકનિકલ ક્ષેત્રની કુલ ૨૭૫ ખાલી જગ્યાઓ માટે ભરતી પ્રક્રિયા હાથ ધરવામાં આવી હતી, જેમાં ગાંધીનગર જિલ્લાના કુલ ૨૦૪ રોજગારવાંચ્છુ ઉમેદવારોએ ઉત્સાહભેર હાજરી આપી હતી. કંપનીઓ દ્વારા લેવામાં આવેલા ઇન્ટરવ્યૂના અંતે કુલ ૧૯૭ ઉમેદવારોની પ્રાથમિક પસંદગી કરવામાં આવી હતી. આ આયોજન દ્વારા જિલ્લાના યુવાનોને રોજગારીની ઉત્તમ તક પ્રાપ્ત થઈ હતી. કાર્યક્રમના અંતે જિલ્લા રોજગાર વિનિમય કચેરી દ્વારા તમામ રોજગારવાંચ્છુ ઉમેદવારો તથા સહભાગી કંપનીઓનો આભાર વ્યક્ત કરવામાં આવ્યો હતો.