જિલ્લા મહિલા અને બાળ અધિકારી કચેરી ગાંધીનગર દ્વારા હયાતી વેરિફિકેશન કેમ્પ યોજવામાં આવ્યો

ગાંધીનગર જિલ્લા મહિલા અને બાળ અધિકારી કચેરી દ્વારા ગંગાસ્વરૂપા બહેનોને વિધવા પેન્શન સહાય યોજના અંતર્ગત હયાતી વેરિફિકેશન માટે જિલ્લા કચેરી સુધી આવવું ન પડે તેમજ તેઓનો સમય અને આર્થિક ખર્ચ બચે તે હેતુસર ગ્રામ્ય કક્ષાએ હયાતી વેરિફિકેશન કેમ્પનું આયોજન કરવામાં આવ્યું હતું.

આ અંતર્ગત તા. 16/05/2026ના રોજ ગાંધીનગર તાલુકાના મોટી આદરજ, જલુદ અને સરઢવ ગ્રામ પંચાયત ખાતે વિશેષ કેમ્પ યોજાયો હતો. કેમ્પ દરમિયાન 300થી વધુ ગંગાસ્વરૂપા બહેનોનું સ્થળ પર જ હયાતી વેરિફિકેશન પૂર્ણ કરવામાં આવ્યું હતું.

આ કામગીરી જિલ્લા મહિલા અને બાળ અધિકારી કચેરી હેઠળ કાર્યરત ડિસ્ટ્રિક્ટ હબ ફોર એમ્પાવરમેન્ટ ઓફ વુમન યોજનાના કર્મચારીઓ દ્વારા સફળતાપૂર્વક પૂર્ણ કરવામાં આવી હતી. જિલ્લા મહિલા અને બાળ અધિકારી કચેરી દ્વારા મહિલાઓને સરકારી યોજનાઓનો લાભ સરળતાથી અને ઘરઆંગણે મળી રહે તે માટે સતત પ્રયાસો હાથ ધરવામાં આવી રહ્યા છે.