ગાંધીનગર જિલ્લામાં કિશોરી મેળાનું આયોજન
ગાંધીનગર જિલ્લા મહિલા અને બાળ અધિકારીની કચેરી દ્વારા માણસા તાલુકાના ચરાડા ગામ સ્થિત કે.જી. માધ્યમિક શાળામાં એક વિશેષ ‘કિશોરી મેળા’નું સફળ આયોજન કરવામાં આવ્યું હતું. કિશોરીઓમાં આરોગ્ય, શિક્ષણ, સુરક્ષા, સ્વચ્છતા તથા મહિલા સશક્તિકરણ અંગે જાગૃતિ લાવવાના મુખ્ય હેતુ સાથે યોજાયેલા આ કાર્યક્રમમાં જિલ્લા મહિલા અને બાળ અધિકારીની કચેરી, જિલ્લા બાળ સુરક્ષા એકમ, જિલ્લા આરોગ્ય વિભાગ તેમજ લીડ બેન્કના અધિકારીઓ અને કર્મચારીઓ ઉપસ્થિત રહ્યા હતા.
આ કાર્યક્રમ દરમિયાન કિશોરીઓને માસિક સ્વચ્છતા અંગે જાગૃત કરવા માટે સેનેટરી પેડનું વિતરણ કરવામાં આવ્યું હતું. આ સાથે જ જિલ્લા આરોગ્ય વિભાગના કર્મચારીઓ દ્વારા કિશોરીઓને આરોગ્ય, પોષણ તેમજ માસિક દરમિયાન રાખવાની સ્વચ્છતા અંગે વૈજ્ઞાનિક માહિતી અને જરૂરી માર્ગદર્શન પૂરું પાડવામાં આવ્યું હતું. કિશોરીઓની સુરક્ષા અને કાયદાકીય અધિકારો મજબૂત કરવાના ભાગરૂપે જિલ્લા બાળ સુરક્ષા એકમ દ્વારા બાળ સુરક્ષા સંબંધિત જુવેનાઇલ જસ્ટિસ અધિનિયમ તથા પોક્સો અધિનિયમ અંગે વિસ્તૃત માહિતી આપવામાં આવી હતી.
આ ઉપરાંત કિશોરીઓ અને મહિલાઓના આર્થિક સશક્તિકરણ માટે લીડ બેન્કના પ્રતિનિધિ શ્રી અનિલ પુરોહિત દ્વારા મહિલાઓ માટે ઉપલબ્ધ વિવિધ બેંકેબલ અને સ્વરોજગારલક્ષી યોજનાઓ અંગે મહત્વનું માર્ગદર્શન પૂરું પાડવામાં આવ્યું હતું. કચેરીના કર્મચારીઓ દ્વારા કેન્દ્ર અને રાજ્ય સરકારની વિવિધ મહિલાલક્ષી કલ્યાણકારી યોજનાઓની વિગતવાર માહિતી આપી કિશોરીઓને તેનો લાભ લેવા પ્રેરિત કરવામાં આવી હતી. આ કિશોરી મેળામાં શાળાના શિક્ષકો, વિદ્યાર્થીઓ તથા વિવિધ વિભાગોના અધિકારીઓ અને કર્મચારીઓએ મોટી સંખ્યામાં ઉપસ્થિત રહીને ઉત્સાહપૂર્વક ભાગ લીધો હતો.
