ગાંધીનગરમાં શિક્ષકોનો હલ્લાબોલ!

TET ફરજિયાતના નિર્ણય સામે રાજ્યભરના હજારો શિક્ષકો રસ્તા પર, સરકારને ઉગ્ર આંદોલનની ચીમકી

ગાંધીનગર :
શિક્ષકો માટે TET (Teachers Eligibility Test) ફરજિયાત બનાવવાના મુદ્દે ગુજરાતમાં ભારે વિરોધ જોવા મળી રહ્યો છે. સુપ્રીમ કોર્ટના તાજેતરના ચુકાદા બાદ રાજ્યભરના હજારો શિક્ષકો આજે ગાંધીનગરમાં એકત્ર થયા અને સરકાર સામે જોરદાર વિરોધ પ્રદર્શન કર્યું.
અમદાવાદ, સુરત, રાજકોટ, વડોદરા, ભાવનગર, જામનગર સહિત વિવિધ જિલ્લાઓમાંથી મોટી સંખ્યામાં શિક્ષકો ગાંધીનગર પહોંચ્યા હતા. શિક્ષકોએ સરકાર વિરુદ્ધ સૂત્રોચ્ચાર કરી પોતાની પડતર માંગણીઓ તાત્કાલિક સ્વીકારવાની માંગ ઉઠાવી હતી. મોટી સંખ્યામાં ભેગા થયેલા શિક્ષકોને ધ્યાનમાં રાખીને ગાંધીનગરમાં ચુસ્ત પોલીસ બંદોબસ્ત ગોઠવવામાં આવ્યો હતો.

શિક્ષકોની મુખ્ય માંગણીઓ

* વર્ષ 2010 પહેલાં નિયુક્ત થયેલા શિક્ષકોને ફરજિયાત TETમાંથી કાયમી મુક્તિ આપવામાં આવે.
* 1 એપ્રિલ 2005 બાદ ભરતી થયેલા શિક્ષકોને જૂની પેન્શન યોજનાનો લાભ આપવામાં આવે.
* ધોરણ 6થી 8ના શિક્ષકોને તેમની જવાબદારી મુજબ અલગ અને ઉચ્ચ ગ્રેડ પે આપવામાં આવે.
* HTAT આચાર્યોને સોંપાયેલા વધારાના શાળાના ચાર્જનો નિર્ણય તાત્કાલિક પરત ખેંચવામાં આવે.
શિક્ષક મહાસંઘના આગેવાનોએ ચેતવણી આપી છે કે જો સરકાર તેમની લાંબા સમયથી પડતર માંગણીઓ અંગે હકારાત્મક નિર્ણય નહીં લે, તો આંદોલન વધુ ઉગ્ર બનાવવામાં આવશે. આગામી દિવસોમાં રાજ્યના શિક્ષકો દિલ્હી ખાતે રાષ્ટ્રીય સ્તરે પણ વિરોધ નોંધાવવાની તૈયારીમાં હોવાનું જણાવાયું છે.