ગાંધીનગર જિલ્લામાં બાગાયતી પાકો માટે બે નવીન યોજનાઓ અમલમાં

ગાંધીનગર જિલ્લાના બાગાયતી ખેતી કરતા ખેડૂતો માટે ચાલુ વર્ષે બાગાયત ખાતા દ્વારા બે નવીન મહત્વકાંક્ષી યોજનાઓ અમલમાં મૂકવામાં આવી છે, જેમાં રસ ધરાવતા ખેડૂતો પાસેથી ઓનલાઈન અરજીઓ મંગાવવામાં આવી છે. આ પૈકીની પ્રથમ યોજના ‘ફળ પાકોમાં ફિલ્ડ કવર થકી ગુણવત્તાયુક્ત ઉત્પાદન મેળવવાનો કાર્યક્રમ’ છે, જે અંતર્ગત ફળપાકના વાવેતર ઉપર સ્ટ્રકચર બનાવી પાકને સિન્થેટિક કાપડ દ્વારા ઢાંકી ખેતી કરવામાં આવે તો ઓછામાં ઓછા ૦.૨૦ હેક્ટરથી મહત્તમ ૧.૦ હેક્ટરની મર્યાદામાં રૂપિયા ૫,૦૦,૦૦૦/- પ્રતિ હેક્ટરના એકમ ખર્ચના ૪૦% અથવા મહત્તમ ₹૨,૦૦,૦૦૦/- પ્રતિ હેક્ટર સુધીની સહાય મળવાપાત્ર રહેશે.

જ્યારે બીજી યોજના ‘બહુસ્તરીય પદ્ધતિથી ફળ પાકોનો વાવેતર વિસ્તાર વધારવાનો કાર્યક્રમ’ છે, જેમાં પાકવાર નિયત થયેલ પ્રતિ રોપા/કલમ સહાય અથવા પ્રતિ કલમ/ટીસ્યુ રોપા દીઠ થયેલ વાસ્તવિક ખર્ચ પૈકી જે ઓછું હોય તે ધ્યાને લઈ વાવેતર કરેલ રોપા/કલમો મુજબ સહાય આપવામાં આવશે. આ યોજના હેઠળ સામાન્ય જાતિના ખેડૂતોને ઓછામાં ઓછા ૦.૨૦ હેક્ટરથી મહત્તમ ૪.૦ હેક્ટર સુધી અને અનુસૂચિત જાતિના ખેડૂતોને ઓછામાં ઓછા ૦.૧૦ હેક્ટરથી મહત્તમ ૪.૦ હેક્ટર સુધી સહાય મળવાપાત્ર રહેશે.

આ બંને નવીન યોજનાઓમાં સહાયનો લાભ લેવા ઇચ્છુક ખેડૂતોએ તારીખ ૦૯/૦૭/૨૦૨૬ થી તારીખ ૨૪/૦૭/૨૦૨૬ દરમિયાન નવીન ‘આઈ-ખેડુત પોર્ટલ ૨.૦’ (www.ikhedut.gujarat.gov.in) પર ઓનલાઈન અરજી કરવાની રહેશે. ખેડૂતોએ આ પોર્ટલ પર પ્રથમ પોતાની નોંધણી કરવાની રહેશે અને ત્યારબાદ જ અરજી કરી શકાશે. અરજી કરતી વખતે જરૂરી કાગળો ઓનલાઈન અપલોડ કરી, અરજી કન્ફર્મ કર્યા બાદ તેની પ્રિન્ટ મેળવીને ખેડૂતોએ પોતાની પાસે જ રાખવાની રહેશે.
આ યોજનાઓ અંગેની વધુ માહિતી મેળવવા માટે ‘નાયબ બાગાયત નિયામકશ્રીની કચેરી, સહયોગ સંકુલ, પાંચમો માળ, સી-બ્લોક, પથિકાશ્રમની બાજુમાં, સેકટર-૧૧, ગાંધીનગર-૩૮૨૦૧૮’ અથવા ફોન નંબર ૦૭૯-૨૩૨-૫૭૭૬૦ પર સંપર્ક કરવા જણાવવામાં આવ્યું છે. ગાંધીનગર જિલ્લાના તમામ પ્રગતિશીલ ખેડૂતોને આ નવી યોજનાઓનો મહત્તમ લાભ મેળવવા પોર્ટલ પર સમયસર અરજી કરવા નાયબ બાગાયત નિયામકશ્રી દ્વારા હાર્દિક અનુરોધ કરવામાં આવ્યો છે.