માનવતા, સહિષ્ણુતા અને સંકલનનું ઉત્તમ ઉદાહરણ: ૨ મહિનાથી ગુમ થયેલાં ૫૫ વર્ષીય મહિલાને ‘સખી’ સેન્ટરે પોતાના પરિવાર સાથે પુનઃ મિલન કરાવ્યું

ભારત સરકારના મહિલા અને બાળ વિકાસ મંત્રાલય દ્વારા પુરસ્કૃત “સખી” વન સ્ટોપ સેન્ટર યોજના સમગ્ર દેશમાં કાર્યરત છે. ગાંધીનગર જિલ્લામાં આ સેન્ટર સિવિલ કેમ્પસ, સેક્ટર-૧૨ ઓડિટોરિયમ હોલની પાછળ ખાતે ખૂબ જ પ્રશંસનીય કામગીરી કરી રહ્યું છે. ગત તા.૦૬ જુલાઈ, ૨૦૨૬ ના રોજ ડભોડા પોલીસ સ્ટેશન દ્વારા ૫૫ વર્ષના એક બિનવારસી મહિલાને આશ્રય માટે “સખી” વન સ્ટોપ સેન્ટર, ગાંધીનગર ખાતે લાવવામાં આવ્યા હતા. શરૂઆતના બે દિવસ મહિલા માનસિક તણાવ અને ડરના કારણે સ્ટાફ સાથે કોઈ વાતચીત કરતા નહોતા. ગુસ્સે થઈને અપશબ્દો બોલતા અને કોઈને નજીક આવવા દેતા નહોતા. પરંતુ સેન્ટરના કર્મચારીઓએ હિંમત હાર્યા વિના ધીરજ, પ્રેમ અને સંવેદનશીલતાથી તેમનો વિશ્વાસ જીતવાનો સતત પ્રયાસ કર્યો. બે દિવસના અથાક પ્રયાસો બાદ મહિલા શાંત થયા અને કાઉન્સેલિંગમાં સહકાર આપ્યો. તેમણે જણાવ્યું હતું કે,તેઓ મધ્ય પ્રદેશના લોદીખેડા વિસ્તારના નિવાસી છે.તેઓ બોરેગાંવ સ્થિત રેમન્ડ કંપનીમાં નોકરી કરતા હતા.

આ વિગતોના આધારે સખી સેન્ટરે તરત જ રેમન્ડ કંપનીની બોરેગાંવ બ્રાન્ચનો સંપર્ક કર્યો. કંપનીના સ્ટાફના સાથ-સહકારથી મહિલાના પરિવારજનોના સંપર્ક નંબરો પ્રાપ્ત થયા. વધુ તપાસ કરતા જાણવા મળ્યું કે પરિવારે તા. ૧૭ મે, ૨૦૨૬ ના રોજ સ્થાનિક પોલીસ મથકે તેમની ગુમ થયાની ફરિયાદ પણ નોંધાવી હતી. મહિલા પોતાના ઘરેથી ઇન્દોર પોતાની બહેનના ઘરે જવા નીકળ્યા હતા. પરંતુ મુસાફરી દરમિયાન તેમનો સામાન, પૈસા અને સંપર્ક નંબરો ચોરાઈ ગયા.અજાણતામાં એક રિક્ષાવાળાએ તેમને મધ્ય પ્રદેશના અજાણ્યા સ્ટેશને ઉતારી દીધા.અને ભૂલથી તેઓ પોતાના વતન જવાના બદલે ગુજરાતના દેહગામ રેલ્વે સ્ટેશન પહોંચી ગયા હતાં.અને ઓળખ કે પૈસા ન હોવાથી તેમણે આશરે બે મહિના સુધી ભીખ માગીને દિવસો વિતાવ્યા.આ દરમિયાન એક ઝઘડામાં તેમને હાથ અને કમરના ભાગે ગંભીર ઈજાઓ થઈ હતી.

તબીબી સારવાર અને સંભાળ
કાઉન્સેલિંગ દરમિયાન મહિલાએ ડાબા હાથમાં અસહ્ય દુખાવાની ફરિયાદ કરતા સખી સેન્ટર દ્વારા તેમને તાત્કાલિક સિવિલ હોસ્પિટલ, ગાંધીનગર લઈ જવામાં આવ્યા. તબીબી તપાસ બાદ તેમના હાથમાં પ્લાસ્ટર બાંધવામાં આવ્યું અને જરૂરી દવાઓ પૂરી પાડવામાં આવી. સખી વન સ્ટોપ સેન્ટરમાં આશરે ૧૮ દિવસ સુધી મહિલાને સુરક્ષિત આશ્રય, કાઉન્સેલિંગ, તબીબી સારવાર અને કાયદાકીય મદદ પૂરી પાડવામાં આવ્યા બાદ તમામ કાયદેસરની પ્રક્રિયાઓ પૂર્ણ કર્યા બાદ, સ્થાનિક પોલીસની હાજરીમાં મહિલાને તેમના દીકરા અને ભાઈને સોંપવામાં આવ્યા. તા. ૨૪ જુલાઈ, ૨૦૨૬ ના રોજ મહિલા સુરક્ષિત રીતે પોતાના ઘરે પહોંચી ગયા છે તે અંગેની ખાતરી પણ સેન્ટર દ્વારા ટેલિફોનિક વાતચીત કરીને કરવામાં આવી છે. સખી વન સ્ટોપ સેન્ટર, ગાંધીનગરની આ કામગીરી દર્શાવે છે કે જો સરકારી યોજનાઓ, પોલીસ પ્રશાસન અને સંવેદનશીલ સ્ટાફ એકસાથે મળીને કામ કરે, તો રસ્તો ભુલેલા લોકોને નવું જીવન અને પોતાના પરિવારનો પ્રેમ પાછો મળી શકે છે.