ગાંધીનગર જિલ્લા પંચાયત ખાતે પીસીપીએનડીટી સલાહકાર સમિતિની બેઠક યોજાઈ

ગાંધીનગર તા. ૨૮ જુલાઈ-
જિલ્લા પંચાયત ગાંધીનગર ખાતે એ.ડી.એચ.ઓ. ડો. ગૌતમ નાયકની અધ્યક્ષતામાં પીસીપીએનડીટીની સલાહકાર સમિતિની બેઠક યોજાઇ હતી. જેમાં જિલ્લાની રજીસ્ટર થયેલ હોસ્પિટલની ચકાસણી તથા નવા રજીસ્ટ્રેશનની અરજીઓ વિશે ચર્ચા કરવામાં આવી હતી. બેઠકમાં ગાંધીનગર, કલોલ અને ખાત્રજ ખાતેની હોસ્પિટલોની આવેલી નવી અરજીઓ અને કલોલ, કુડાસણ તથા ગાંધીનગર ખાતેની અન્ય ૪ હોસ્પિટલોની રિન્યુઅલ અરજી અંતર્ગત ઉપલબ્ધ સુવિધાઓ, તેના માળખા અને અન્ય રજીસ્ટ્રેશન પ્રોસેસ વિશે ચર્ચા કરવામાં આવી હતી. સાથે જ જિલ્લાના માણસા, કલોલ, દહેગામ અને ગાંધીનગર તાલુકામાં રજીસ્ટર્ડ તમામ હોસ્પિટલ, ક્લિનિક અને સોનોગ્રાફી સેન્ટરની ચકાસણી પૂર્ણ કરવામાં આવેલ છે તેમ જણાવવામાં આવ્યું હતું. આ તકે, મ્યુનિસિપલ કોર્પોરેશન કચેરી ગાંધીનગર દ્વારા સોનોગ્રાફી ક્લિનિકની ચકાસણી ઓછી કરવામાં આવેલ હોઈ એડીએચઓશ્રીએ ચકાસણી ઝડપી પૂર્ણ કરવા તાકીદ કરી હતી. સલાહકાર સમિતિની આ બેઠકમાં સી.ડી.એચ.ઓ., ટી.એચ.ઓ, સિવિલ હોસ્પિટલના તબીબો તથા અન્ય સંકલિત વિભાગના અધિકારીઓ ઉપસ્થિત રહ્યા હતા.