સ્પોર્ટ્સ ઓથોરીટી ઓફ ગુજરાત દ્વારા ખેલાડીઓ માટે શિષ્યવૃતિ અને વૃતિકા સહાયની ઓનલાઈન અરજીઓ મંગાવાઈ

ગાંધીનગર તા.૧૩ ઓગસ્ટ –
ગુજરાત સરકારના રમતગમત, યુવા અને સાંસ્કૃતિક પ્રવૃત્તિઓ વિભાગ, ગાંધીનગર હસ્તકની ‘સ્પોર્ટ્સ ઓથોરીટી ઓફ ગુજરાત’ દ્વારા વર્ષ ૨૦૨૫-૨૬ દરમિયાન સ્કૂલ ગેમ્સ ફેડરેશન ઓફ ઇન્ડિયાની વિવિધ રાજ્ય અને રાષ્ટ્રીય કક્ષાની રમત સ્પર્ધાઓમાં ભાગ લેનાર અને વિજેતા બનનાર ખેલાડીઓ માટે નાણાકીય સહાય યોજના જાહેર કરવામાં આવી છે.
આ યોજના હેઠળ યોગ્યતા ધરાવતા રાજ્યકક્ષાના મેડલ વિજેતાઓને રૂ. ૨,૫૦૦/- ની શિષ્યવૃતિ સહાય તથા રાષ્ટ્રીયકક્ષાએ ભાગ લેનાર ખેલાડીઓને રૂ. ૨,૦૦૦/- ની વૃતિકા સહાય આપવામાં આવશે. યોજનાના લાભ મેળવવા ઈચ્છુક ખેલાડીઓએ તા. ૩૦/૧૨/૨૦૨૬ સુધીમાં ઓફિશિયલ વેબસાઈટ www.sportsauthority.gujarat.gov.in પર અરજી કરવાની રહેશે. નિયત પાત્રતા ધરાવતા તમામ ખેલાડીઓએ નિર્ધારિત સમયમર્યાદામાં પોર્ટલ પર જઈને ઓનલાઈન અરજી કરી લેવાની રહેશે. યોજના અંગે વધુ વિગતો કે માહિતી મેળવવા માટે ‘જિલ્લા રમતગમત અધિકારી, ગાંધીનગર જિલ્લા રમત પ્રશિક્ષણ કેન્દ્ર, સેક્ટર-૨૧, ગાંધીનગર ખાતે સંપર્ક કરવાનો રહેશે.