પ્રાકૃતિક કૃષિ તાલીમ શિબિર: સમૃદ્ધિ અને આરોગ્યની નવી દિશા

ગાંધીનગર જિલ્લાના શિહોલી મોટી ગામ સ્થિત ‘પ્રાંતેનમા પ્રાકૃતિક ફાર્મ’ ખાતે ૧૯ ઓગસ્ટના રોજ પરંપરાગત કૃષિ વિકાસ યોજના (PKVY) હેઠળ ગાંધીનગર જિલ્લાના ખેડૂતો માટે એક દિવસીય તાલીમ અને વર્કશોપનું આયોજન કરવામાં આવ્યું હતું.
કાર્યક્રમની શરૂઆત ગુજરાત પ્રાકૃતિક કૃષિ ફેડરેશનના પ્રમુખ અને ગુજરાત પ્રદેશ સહપ્રવક્તા શ્રી હિતેન્દ્રભાઈ પટેલ તથા શ્રી શ્રી રવિશંકર વ્યક્તિ વિકાસ કેન્દ્ર, બેંગલુરુના ગુજરાતના પ્રતિનિધિ શ્રી ચિંતનભાઈ વ્યાસની વિશેષ ઉપસ્થિતિમાં કરવામાં આવી હતી.
આ વર્કશોપમાં ઉપસ્થિત મહાનુભાવો દ્વારા પ્રાકૃતિક ખેતીના વિવિધ પાસાઓ, પરંપરાગત કૃષિ વિકાસ યોજનાના લાભો તેમજ ટેકનિકલ સપોર્ટ એજન્સીની કામગીરી અંગે વિસ્તૃત માર્ગદર્શન પૂરું પાડવામાં આવ્યું હતું. આ દરમિયાન ખેડૂતો અને તજજ્ઞો વચ્ચે પ્રાકૃતિક કૃષિ અંગેના વિચારોનું આદાન-પ્રદાન પણ થયું હતું.
આ તાલીમ શિબિરમાં ગાંધીનગર જિલ્લાના બહોળી સંખ્યામાં પ્રાકૃતિક ખેતી કરતા ખેડૂતોએ ઉત્સાહભેર ભાગ લીધો હતો. સમગ્ર કાર્યક્રમનું સફળ સંચાલન અને વ્યવસ્થા ‘નરેન્દ્ર મંડીર – શિહોલી મોટી’ દ્વારા કરવામાં આવી હતી.