ગાંધીનગર જિલ્લા કલેક્ટર શ્રી રવિન્દ્ર ખતાલેની માણસા તાલુકાના રામપુરા ગામની સરપ્રાઈઝ મુલાકાત
ગાંધીનગર જિલ્લાના નાગરિકોને સરકારી યોજનાઓ અને પાયાની સુવિધાઓનો યોગ્ય લાભ મળી રહે તે માટે જિલ્લા કલેક્ટર શ્રી રવિન્દ્ર ખતાલે દ્વારા ગ્રામ્ય વિસ્તારોની આકસ્મિક મુલાકાતો લેવાનો ક્રમ સતત જારી રાખવામાં આવ્યો છે. જે અંતર્ગત આજ રોજ તેમણે માણસા તાલુકાના રામપુરા ગામની ક્ષેત્રીય મુલાકાત લીધી હતી. આ મુલાકાત દરમિયાન કલેક્ટરશ્રીએ રામપુરા ગામમાં આરોગ્ય વિષયક સેવાઓ અને સુવિધાઓનું પ્રત્યક્ષ નિરીક્ષણ કરીને ‘એપેન્ડિક્સ એ’ ભરીને જરૂરી વિગતોની નોંધ લીધી હતી. ગ્રામજનોને ઉત્તમ સ્વાસ્થ્ય સુવિધાઓ સમયસર મળી રહે તે હેતુથી તેમણે ગામના સરપંચશ્રી, સ્થાનિક આગેવાનો તેમજ આશા વર્કર્સ સાથે એક વિશેષ બેઠક યોજી હતી. આ બેઠકમાં ગામમાં ચાલી રહેલી આરોગ્ય લક્ષી કામગીરી, રસીકરણ અને આરોગ્ય સંબંધિત સમસ્યાઓ અંગે વિગતવાર ચર્ચા-વિચારણા કરવામાં આવી હતી.
ગામના બાળકો અને બહેનોના પોષણ અને શિક્ષણનું સ્તર જાણવા માટે કલેક્ટરશ્રીએ ગામની આંગણવાડીની પણ ખાસ મુલાકાત લીધી હતી. તેમણે આંગણવાડીમાં ઉપલબ્ધ ભૌતિક સુવિધાઓ અને સ્વચ્છતાનું નિરીક્ષણ કરવા સાથે આંગણવાડી વર્કરોની કામગીરીની પણ ગહન સમીક્ષા કરી હતી. વિશેષરૂપે, ભૂલકાઓને આપવામાં આવતા ભોજનને તેમણે પોતે ટેસ્ટ કરી તેની ક્વોલિટી અને ગુણવત્તા ચકાસી હતી. આ વેળાએ કલેક્ટરશ્રીએ નાના ભૂલકાઓ વચ્ચે બેસી તેમની સાથે વ્હાલસોયો સંવાદ સાધી બાળકોને પ્રોત્સાહિત કર્યા હતા.
નાના બાળકો અને આંગણવાડીના ભૂલકાઓ આવતીકાલના આપણા દેશનું ભવિષ્ય છે. તેથી, કલેક્ટરશ્રી દ્વારા આંગણવાડીઓની વારંવાર મુલાકાત લઈ આ ભૂલકાઓના સર્વાંગી વિકાસ અને શિક્ષણ સાથે તેમના યોગ્ય ઉછેર અને પોષણયુક્ત આહારની પણ ખાસ તકેદારી લેવામાં આવી રહી છે. ઉલ્લેખનીય છે કે, કલેક્ટર શ્રી રવિન્દ્ર ખતાલે દ્વારા જિલ્લાના છેવાડાના માનવી સુધી સરકારી સેવાઓ પારદર્શક અને ઝડપી રીતે પહોંચે તે માટે વારંવાર આ પ્રકારે આકસ્મિક નિરીક્ષણ કરવામાં આવે છે. કલેક્ટરશ્રીની આ મુલાકાતથી રામપુરા ગામના સ્થાનિક તંત્ર અને આરોગ્ય સ્ટાફમાં વધુ સક્રિયતા સાથે કામ કરવાનો નવો ઉત્સાહ જોવા મળ્યો હતો.
