ગાંધીનગરમાં એન્ટિમાઇક્રોબિયલ સ્ટ્યુઅરડશિપ પ્રોગ્રામ અંતર્ગત તબીબો માટે તાલીમ યોજાઈ
ગાંધીનગર: ગુજરાતના State Action Plan for Containment of Antimicrobial Resistance (SAPCAR) અંતર્ગત એન્ટિમાઇક્રોબિયલ સ્ટ્યુઅરડશિપ પ્રોગ્રામ (AMSP) અંગે તાલીમનું આયોજન કરવામાં આવ્યું હતું. મેડિકલ સુપરિન્ટેન્ડેન્ટ કચેરી, GMERS મેડિકલ કોલેજ અને સંલગ્ન જનરલ હોસ્પિટલ, ગાંધીનગર દ્વારા SHRESHTAના સહયોગથી આયોજિત આ તાલીમમાં વિવિધ ક્લિનિકલ વિભાગોના વરિષ્ઠ તબીબો, સિનિયર ફેકલ્ટી સભ્યો અને રેસિડન્ટ ડૉક્ટર્સે ભાગ લીધો હતો. મેડિકલ સુપરિન્ટેન્ડેન્ટ ડૉ. મીતા એમ. પરીખ અને એડિશનલ ડીન તથા ફાર્માકોલોજી વિભાગના પ્રોફેસર અને વડા ડૉ. દર્શન દવેના માર્ગદર્શન હેઠળ યોજાયેલી તાલીમમાં એન્ટિમાઇક્રોબિયલ રેઝિસ્ટન્સ (AMR)ના વધતા પડકારો, એન્ટિબાયોટિક્સની કાર્યપદ્ધતિ અને વિવિધ ચેપમાં યોગ્ય એન્ટિબાયોટિકની પસંદગી અંગે નિષ્ણાતોએ માર્ગદર્શન આપ્યું હતું.
માઇક્રોબાયોલોજી વિભાગનાં ડૉ. પારુલ પટેલ, ડૉ. પાયલ રાવલ અને ડૉ. નીતા ખોખર, ફાર્માકોલોજી વિભાગના ડૉ. રુત્વીજ હેડમબા તથા મેડિસિન વિભાગનાં ડૉ. રીમા સહિતના નિષ્ણાતોએ વિવિધ વિષયો પર સત્રો લીધાં હતાં. તાલીમમાં દવાઓ સામે પ્રતિરોધક ક્ષમતા ધરાવતા બેક્ટેરિયાની ઓળખ, તેમના કારણે થતા ચેપના નિયંત્રણ અને એન્ટિબાયોટિક્સના તર્કસંગત ઉપયોગ અંગે ચર્ચા કરવામાં આવી હતી. યોગ્ય નમૂનાઓ એકત્રિત કરવા અને તેમનું યોગ્ય પ્રોસેસિંગ કરવા, માઇક્રોબાયોલોજી રિપોર્ટનું સચોટ અર્થઘટન કરવા તથા કલ્ચર અને એન્ટિમાઇક્રોબિયલ સસેપ્ટિબિલિટી ટેસ્ટિંગના પરિણામોના આધારે દર્દીને વધુ અસરકારક સારવાર આપવા પર ભાર મૂકવામાં આવ્યો હતો. એન્ટિબાયોટિક્સના વપરાશનું મોનિટરિંગ અને તેની સમીક્ષા અંગે પણ માર્ગદર્શન આપવામાં આવ્યું હતું.
વિશ્વ આરોગ્ય સંસ્થાની AWaRe વર્ગીકરણ પદ્ધતિ મુજબ Access, Watch અને Reserve જૂથની એન્ટિબાયોટિક્સના યોગ્ય ઉપયોગ અંગે સમજ આપવામાં આવી હતી. Access જૂથની યોગ્ય દવાઓને પ્રાથમિકતા આપવા, Watch જૂથની દવાઓનો સાવચેતીપૂર્વક ઉપયોગ કરવા અને Reserve જૂથની એન્ટિબાયોટિક્સનો ઉપયોગ જરૂરી હોય ત્યારે જ, યોગ્ય ક્લિનિકલ મૂલ્યાંકન તથા પ્રી-ઑથોરાઇઝેશન પ્રક્રિયા અનુસાર કરવા પર ભાર મૂકવામાં આવ્યો હતો. દર્દીની તબીબી સ્થિતિ અને હોસ્પિટલની નીતિ અનુસાર સમયસર સારવાર આપવાનું મહત્વ પણ સમજાવવામાં આવ્યું હતું.
હેન્ડ હાઇજીન અને ચેપ નિવારણ અંગે પ્રતિજ્ઞા
15 ઑક્ટોબર, ગ્લોબલ હેન્ડવોશિંગ ડે નિમિત્તે હેન્ડ હાઇજીનના મહત્વ અંગે પણ જાગૃતિ ફેલાવવામાં આવી હતી. હોસ્પિટલમાં હાથની સ્વચ્છતાનું યોગ્ય પાલન ન થવાથી ચેપ એક દર્દીમાંથી બીજા દર્દીમાં ફેલાવાનું જોખમ વધી શકે છે. આવા હેલ્થકેર-એસોસિએટેડ ઇન્ફેક્શનને અટકાવવા માટે દર્દીને સ્પર્શ કરતાં પહેલાં, એસેપ્ટિક પ્રક્રિયા કરતાં પહેલાં, શરીરના પ્રવાહીનો સંપર્ક થયા પછી, દર્દીને સ્પર્શ કર્યા પછી અને દર્દીની આસપાસની વસ્તુઓને સ્પર્શ કર્યા પછી હાથની યોગ્ય સ્વચ્છતા જાળવવી અત્યંત જરૂરી છે. આ પ્રસંગે ઉપસ્થિત તબીબો અને આરોગ્યકર્મીઓએ ચેપનો ફેલાવો અટકાવવા, હેન્ડ હાઇજીનના નિયમોનું નિયમિત પાલન કરવા અને દર્દીઓની સલામતી જાળવવા માટે સામૂહિક પ્રતિજ્ઞા લીધી હતી. આ તાલીમનો મુખ્ય ઉદ્દેશ બિનજરૂરી એન્ટિબાયોટિક વપરાશ ઘટાડવો, યોગ્ય નિદાન અને લેબોરેટરી રિપોર્ટના આધારે સારવારને પ્રોત્સાહન આપવું, દર્દીની સારવારનાં પરિણામોમાં સુધારો કરવો અને એન્ટિમાઇક્રોબિયલ રેઝિસ્ટન્સના નિયંત્રણ માટે તમામ આરોગ્યકર્મીઓ વચ્ચે સંકલન મજબૂત બનાવવાનો હતો.
