બાલિકા પંચાયતની પુનઃરચના અંગે આંગણવાડી કાર્યકર્તાઓ માટે એક દિવસીય તાલીમ કાર્યક્રમ યોજાયો
જિલ્લા મહિલા અને બાળ અધિકારીની કચેરી, ગાંધીનગર દ્વારા ‘બેટી બચાવો બેટી પઢાવો’ યોજના અંતર્ગત સાદરા સ્થિત સરદાર પટેલ તાલીમ કેન્દ્ર ખાતે બાલિકા પંચાયતની પુનઃરચના અંગે આંગણવાડી કાર્યકર્તાઓ માટે એક દિવસીય તાલીમ કાર્યક્રમનું આયોજન કરવામાં આવ્યું હતું. આ તાલીમ દરમિયાન આંગણવાડી કાર્યકર્તાઓને બાલિકા પંચાયતની પુનઃરચનાની સંપૂર્ણ પ્રક્રિયા અંગે વિસ્તૃત માર્ગદર્શન પૂરું પાડવામાં આવ્યું હતું. જેમાં બાલિકા પંચાયતની રચના, સરપંચ, ઉપસરપંચ અને સભ્યોની પસંદગી માટેની લોકશાહી ચૂંટણી પ્રક્રિયા, ચૂંટણીનું આયોજન તેમજ ચૂંટણી પ્રક્રિયા પૂર્ણ થયા બાદ ચૂંટાયેલા સભ્યો સાથે પ્રથમ બેઠક કેવી રીતે યોજવી તે અંગે તબક્કાવાર સમજ આપવામાં આવી હતી.
આ ઉપરાંત, બાલિકા પંચાયતના મૂળભૂત હેતુ અને કાર્યપદ્ધતિ, ગ્રામ્ય કક્ષાએ દીકરીઓના પ્રશ્નો અને અધિકારો અંગે જાગૃતિ લાવવી તથા ચૂંટણી પ્રક્રિયામાં તેમની સક્રિય ભાગીદારી સુનિશ્ચિત કરવા બાબતે જરૂરી સૂચનો કરવામાં આવ્યા હતા. આ તાલીમ કાર્યક્રમમાં જિલ્લા મહિલા અને બાળ અધિકારીની કચેરી, ગાંધીનગર તરફથી શ્રી અશ્વિન જાસકિયા અને શ્રીમતી નસરીન ખલિયાણીએ ઉપસ્થિત રહી આંગણવાડી કાર્યકર્તાઓને વિષયલક્ષી તાલીમ અને માર્ગદર્શન આપ્યું હતું. ગ્રામ્ય કક્ષાએ બાલિકા પંચાયતની પુનઃરચનાની કામગીરી સુવ્યવસ્થિત રીતે પૂર્ણ થાય અને દીકરીઓને લોકશાહી પ્રક્રિયામાં સહભાગી બનાવી તેમનામાં નેતૃત્વ, આત્મવિશ્વાસ, નિર્ણયશક્તિ અને સામાજિક જવાબદારીની ભાવના વિકસે તે હેતુથી આ તાલીમનું સફળ આયોજન કરવામાં આવ્યું હતું.

