IPL 2022નું આયોજન મુંબઈમાં નક્કી, આ 3 મેદાન પર રમાશે મેચ, 20 ફેબ્રુઆરીએ સત્તાવાર જાહેરાત

PL (IPL 2022)ની 15મી સિઝન ક્યાં યોજાશે? આ મોટા પ્રશ્નનો જવાબ હવે લગભગ સ્પષ્ટ છે. ધ ટેલિગ્રાફના અહેવાલ મુજબ આ ટુર્નામેન્ટનું આયોજન મુંબઈમાં જ કરવામાં આવશે. રિપોર્ટમાં કહેવામાં આવ્યું છે કે, ગુરુવારે સાંજે મળેલી BCCI અધિકારીઓની બેઠકમાં નિર્ણય લેવામાં આવ્યો હતો કે, મેચ 27 માર્ચથી મુંબઈ (Mumbai)માં રમાશે. BCCIના આ નિર્ણય પાછળનું કારણ શહેરમાં સતત ઘટી રહેલા કોરોના કેસ છે. જો કે આ અંગેનો અંતિમ નિર્ણય 20 ફેબ્રુઆરીએ જ લેવામાં આવશે, જે સ્થળનું નામ જાહેર કરવાની અંતિમ તારીખ છે. આઈપીએલના (IPL) આયોજન માટે બીસીસીઆઈ સમક્ષ દક્ષિણ આફ્રિકા (South Africa) નો વિકલ્પ પણ ખુલ્લો છે.

બીસીસીઆઈ ( BCCI)ના સૂત્રોએ ધ ટેલિગ્રાફને જણાવ્યું કે, બોર્ડ અત્યારે મુંબઈની બહાર વિચારી રહ્યું નથી. કોરોના (Corona)ની ત્રીજી લહેર નબળી પડી રહી છે. આવી સ્થિતિમાં ટૂર્નામેન્ટને ભારતની બહાર લઈ જવાનો કોઈ અર્થ નથી. IPL 2022 માટે ખેલાડીઓની મેગા ઓક્શન બેંગલુરુમાં 12-13 ફેબ્રુઆરીના રોજ યોજાશે.

ધ ટેલિગ્રાફના રિપોર્ટમાં મુંબઈ (Mumbai)ના તે 3 મેદાનોનો પણ ઉલ્લેખ છે, જેના પર IPL 2022ની મેચો રમાશે. આ મેચો વાનખેડે, બ્રેબોર્ન અને ડીવાય પાટિલ સ્ટેડિયમમાં રમાશે. આ સિવાય જરૂર પડે પુણેમાં પણ રમાઈ શકે છે.

ટીમોને હવાઈ મુસાફરી કરવી નહીં પડે

મુંબઈ અને તેની આસપાસ આઈપીએલ 2022 ના આયોજન પાછળનો સૌથી મોટો ફાયદો એ થશે કે ટીમોને હવાઈ મુસાફરી કરવી પડશે નહીં, જે કોરોના ફેલાવવાનું એક મોટું કારણ હોઈ શકે છે. રિપોર્ટમાં કહેવામાં આવ્યું છે કે, જો જરૂર પડશે તો બાંદ્રા કુર્લા સ્ટેડિયમનો ઉપયોગ ટીમોની તાલીમ અને પ્રેક્ટિસ માટે પણ કરવામાં આવશે. ઘરઆંગણે મોટાભાગની મેચો આ મેદાન પર રમાય છે.

રણજી ટ્રોફી 2 તબક્કામાં યોજવા પર ભાર

ગુરુવારે યોજાયેલી BCCI અધિકારીઓની બેઠકમાં IPL 2022 સિવાય બે તબક્કામાં રણજી ટ્રોફી યોજવા પર પણ ચર્ચા થઈ હતી. આનો પ્રથમ તબક્કો ફેબ્રુઆરીથી માર્ચ દરમિયાન રમાશે. જ્યારે IPL 2022ના અંત પછી જૂન અને જુલાઈમાં બીજો તબક્કો રમાશે. બોર્ડના પ્રમુખ સૌરવ ગાંગુલી રણજી ટ્રોફીને ટ્રેક પર લાવવા માંગે છે. ટૂર્નામેન્ટ શરૂ થવાના 10 દિવસ પહેલા 4 જાન્યુઆરીએ બીસીસીઆઈએ કોરોનાને કારણે તેના સસ્પેન્શનની જાહેરાત કરી હતી. આ સિવાય સીકે ​​નાયડુ ટ્રોફી અને સિનિયર વિમેન્સ ટી20 લીગ પણ મુલતવી રાખવામાં આવી હતી.