આજે ગુજરાત વિધાનસભા ચૂંટણીની તારીખો થશે જાહેર, બપોરે 12:00 વાગે ચૂંટણી પંચની પ્રેસ કોન્ફરન્સ

ગુજરાત વિધાનસભા ચૂટણી પર આખા દેશની પાર્ટીઓની નજર છે એવામાં મળી રહેલા સમાચાર અનુસાર આજે 12 વાગ્યે ગુજરાત વિધાનસભા ચૂંટણીની તારીખો જાહેર થઈ શકે છે. ઘણા સમયથી ગુજરાત વિધાનસભા ચૂંટણીની તારીખો જાહેર થવાની રાહ જોવામાં આવી રહી છે જેનો અંત આજે બપોરે 12 વાગ્યે આવશે. આજે ચૂંટણી પંચની બપોરે 12 વાગ્યે પ્રેસ કોન્ફરન્સ યોજાવાની છે. જેમાં ગુજરાત વિધાનસભા ચૂંટણીની તારીખો જાહેર કરવામાં આવશે.

ગુજરાત વિધાનસભા ચૂંટણી બે તબક્કામાં યોજાઈ શકે એવી સંભાવના વ્યક્ત કરવામાં આવી રહી છે, જેમાં નવેમ્બર અંતમાં પ્રથમ તબક્કાનું મતદાન થઈ શકે એવી અટકળોએ પણ જોર પકડ્યું છે. દર વખતે ગુજરાતમાં બે જ પાર્ટીઓ હતી ભાજપ અને કોંગ્રેસ. જ્યારે આ વખતે કેજરીવાલની આમ આદમી પાર્ટીએ મજબૂત દેખાવ કરી રહી છે.ગુજરાતમાં આ વખતે ત્રિપાંખીયો ચૂંટણી જંગ ખેલાઈ રહ્યો છે. ભાજપ અને કોંગ્રેસ સાથે આમ આદમી પાર્ટી પણ તમામ 182 સીટો પરથી ચૂંટણી લડવાની છે. બીજી તરફ તમામ પાર્ટીઓ દ્વારા પૂરજોશમાં પ્રચાર અભિયાન ચાલી રહ્યું છે. ત્યારે આ વખતે ચૂંટણીના રણમેદાનમાં કોણ બાજી મારશે તે ખાસ જોવાનું રહેશે.