દહેગામ-નરોડા હાઈવે પર કારની ટક્કરથી એક્ટિવા પર સવાર શિક્ષિકાનું ઘટનાસ્થળે જ મોત

દહેગામ નરોડા હાઈવે રોડ પર આજે સવારે કાર ચાલકે પોતાની કાર પૂરપાટ ઝડપે અને બેદરકારીથી ચલાવી એક્ટિવાને જોરદાર ટક્કર મારી હતી. આ અકસ્માતમાં એક્ટિવા પર સવાર શિક્ષકનું રોડ પર પટકાતા ઘટનાસ્થળે જ મોત નીપજ્યું હતું. જ્યારે તેના પતિને ગંભીર હાલતમાં ગાંધીનગર સિવિલમાં સારવાર માટે ખસેડવામાં આવ્યો છે. આ અંગે પોલીસે ઘટના સ્થળે પહોંચી કાયદેસરની કાર્યવાહી હાથ ધરી છે.
દહેગામ નરોડા હાઈવે રોડ પર આજે સવારે કાર અને એક્ટિવા વચ્ચે સર્જાયેલા અકસ્માતમાં મહિલા શિક્ષિકાનું ઘટનાસ્થળે જ કરૂણ મોત નીપજ્યું હતું. પ્રાપ્ત વિગતો મુજબ દહેગામ ખાતે વેદ ફ્લેટમાં રહેતા ખુશ્બુબેન ચિંતનભાઈ સુખડીયા ગ્લોબલ ઈન્ટરનેશનલ સ્કૂલમાં શિક્ષિકા તરીકે ફરજ બજાવતા હતા. આજે સવારે તેમના પતિ ચિંતનભાઈ ખુશ્બુબેનને શાળાએ મૂકવા માટે એક્ટિવા લઈને ઘરેથી નીકળ્યા હતા.
તે સમયે ખુશ્બુબેન એક્ટિવાની પાછળ બેઠા હતા. ત્યારે દહેગામ નરોડા હાઇવે રોડ પૂજા હેવન પાસે અમદાવાદ તરફથી આવતી કારના ચાલકે પુરપાટ ઝડપે કાર હંકારી એક્ટિવાને જોરદાર ટક્કર મારી હતી. અકસ્માત થતાં જ એક્ટિવાની પાછળ બેઠેલા ખુશ્બુબેન કૂદીને રોડ પર પટકાયા હતા. જેમનું માથા અને શરીરના ભાગે ગંભીર ઇજાઓ થતાં સ્થળ પર જ કરૂણ મોત નિપજ્યું હતું. જ્યારે ચિંતનભાઈને પણ ગંભીર ઈજાઓ પહોંચી હતી.
આ અકસ્માતના પગલે મોટી સંખ્યામાં રાહદારીઓ અને વાહનચાલકો ઉમટી પડ્યા હતા. બનાવની જાણ થતાં ગંભીર રીતે ઘવાયેલા ચિંતનભાઈને 108 એમ્બ્યુલન્સ મારફતે ગાંધીનગર સિવિલ હોસ્પિટલમાં સારવાર અર્થે ખસેડાયા હતા. જ્યાં તેની હાલત નાજુક હોવાનું જાણવા મળે છે. ત્યારબાદ પોલીસે પણ ઘટના સ્થળે પહોંચી જરૂરી કાયદેસરની કાર્યવાહી હાથ ધરી હતી.