ઐતિહાસિક બદલાવ: હવે ભારત બ્રિટનને શીખવશે પાઠ!

ભારતીય વાયુસેના (IAF) અને બ્રિટનની રોયલ એરફોર્સ (RAF) વચ્ચેના સંબંધોમાં એક મોટો ઐતિહાસિક બદલાવ આવ્યો છે. હવે IAFના બે શ્રેષ્ઠ ‘ગન’ ટ્રેનર્સ ટૂંક સમયમાં બ્રિટનમાં RAFના ફાઇટર પાઇલોટ્સને તાલીમ આપશે. આ પગલું ભારત અને બ્રિટન વચ્ચેના મજબૂત સંરક્ષણ સંબંધો અને વ્યાપક સૈન્ય-રાજકીય લક્ષ્યોને સમર્થન આપવાના નવા અભિગમનો ભાગ છે.

IAFના આ બંને ટ્રેનર્સ વેલ્સના એન્ગલસી ટાપુ પર સ્થિત RAF વેલીની નંબર 4 ફ્લાઇંગ ટ્રેનિંગ સ્કૂલમાં RAF એરક્રૂ અધિકારીઓને પ્રશિક્ષણ આપશે. તેઓ BAE હૉક TMK 2 વિમાન પર તાલીમ આપશે અને ત્રણ વર્ષ માટે એન્ગલસીમાં રહેશે. RAFના વરિષ્ઠ સૂત્રએ જણાવ્યું કે તાલીમની શરૂઆતની તારીખ ઑક્ટોબર 2026 પહેલાં નક્કી થશે નહીં.

આ કરારની જાહેરાત વડાપ્રધાન મોદીએ ગયા અઠવાડિયે બ્રિટનના વડાપ્રધાન કીર સ્ટારમરની મુંબઈ મુલાકાત દરમિયાન કરી હતી. આ મુલાકાત દરમિયાન, ભારતીય સેના માટે બ્રિટન-નિર્મિત મલ્ટિરોલ મિસાઇલો માટે 350 મિલિયન પાઉન્ડની ડિફેન્સ ડીલ પર પણ હસ્તાક્ષર કરવામાં આવ્યા હતા. ટ્રેનર્સનો પગાર ભારત સરકાર ચૂકવશે, જ્યારે બ્રિટનનું રક્ષા મંત્રાલય તેમના રહેઠાણની વ્યવસ્થા કરશે.