ગાંધીનગર GMERS ખાતે ‘સર્જિકલ ડિજિટલ બસ’ દ્વારા ૫૧ તબીબોને આંતરરાષ્ટ્રીય કક્ષાની સર્જિકલ તાલીમ અપાઈ

ગાંધીનગરની GMERS સિવિલ હોસ્પિટલ ખાતે તબીબો માટે અદ્યતન સર્જિકલ તાલીમ હવે ‘વ્હીલ્સ પર’ એટલે કે મોબાઈલ યુનિટ દ્વારા ઉપલબ્ધ બની છે. JJW-3.0 (Johnson & Johnson Institute on Wheels) મિશન અંતર્ગત એક ખાસ સર્જિકલ ડિજિટલ બસ ગાંધીનગર પહોંચી હતી, જેમાં સંસ્થાના ૫૧ જેટલા ડોક્ટરોને પ્રાયોગિક (Hands-on) તાલીમ આપવામાં આવી હતી. આ સફળ તાલીમ કાર્યક્રમનું આયોજન મેડિકલ સુપરિન્ટેન્ડન્ટ ડૉ. મીતા પરીખ અને સર્જરી વિભાગના વડા (HOD) ડૉ. નિયતિ લાખાણીના સીધા માર્ગદર્શન હેઠળ કરવામાં આવ્યું હતું.
આ મોબાઈલ ટ્રેનિંગ યુનિટમાં આંતરરાષ્ટ્રીય ધોરણો મુજબના સર્જિકલ સાધનો અને સિમ્યુલેશન ટેકનોલોજી ઉપલબ્ધ છે.જેમાં તબીબોને માત્ર થિયરી જ નહીં, પરંતુ લાઈવ ડેમો અને સિમ્યુલેશન દ્વારા પ્રાયોગિક તાલીમ આપવામાં આવી હતી.તથા સર્જનોને આધુનિક સર્જિકલ ટેકનિક્સ, પેશન્ટ સેફ્ટી, ઈન્ફેક્શન કંટ્રોલ અને નવીનતમ ઓપરેશન પ્રક્રિયાઓ વિશે ઊંડાણપૂર્વક સમજાવવામાં આવ્યું હતું. આ પ્રસંગે ડૉ. મીતા પરીખ અને ડૉ. નિયતિ લાખાણીએ જણાવ્યું હતું કે, આ પ્રકારના મિશન દ્વારા સરકારી હોસ્પિટલોમાં કાર્યરત ડોક્ટરોને વૈશ્વિક કક્ષાની તાલીમ ઘરઆંગણે મળી રહે છે. આ આધુનિક કૌશલ્યનો સીધો લાભ સામાન્ય નાગરિકોને મળશે અને દર્દીઓને વધુ ગુણવત્તાસભર સારવાર પૂરી પાડી શકાશે. ગાંધીનગર GMERS હોસ્પિટલના ડોક્ટરો અને મેડિકલ સ્ટાફ દ્વારા આ પહેલને ભારે પ્રતિસાદ મળ્યો હતો અને આ તાલીમ આગામી સમયમાં જટિલ સર્જરીઓ માટે આશીર્વાદરૂપ સાબિત થશે.