દીકરીઓના સુરક્ષિત ભવિષ્ય માટે અને સર્વાઇકલ કેન્સર માટે માત્ર એક જ ઉપાય HPV રસીકરણ

દીકરીઓના સ્વાસ્થ્ય સાથે જોડાયેલા ગંભીર મુદ્દા એવા સર્વાઇકલ કેન્સર સામે રક્ષણ આપવા માટે HPV રસી અંગે ફેલાયેલી ભ્રાંતિઓને તોડવા આરોગ્ય અને પરિવાર કલ્યાણ વિભાગ દ્વારા જન જાગૃતિ અભિયાન થકી લગ્ન, વંધ્યત્વ, ઉંમર અને દેશી ઉપચાર અંગેની “ગેરમાન્યતાઓને તોડી, સત્યને સ્વીકારી દીકરીઓને કેન્સર સામે સમયસર રક્ષણ મળે તે આ અભિયાનનો મુખ્ય હેતુ છે.

લગ્ન અને રસી અંગેની માન્યતા
લગ્ન પછી જ રસી લેવાની હોય. તેવી માન્યતા ખોટી છે. લગ્ન પહેલાં રસી લેવાથી વધુ અસરકારક રક્ષણ મળે છે અને જો લગ્ન પછી લેવાથી તેની અસર ઘટી શકે છે.

દેશી ઉપચાર અંગેની માન્યતા
સારો ખોરાક, યોગ અને દેશી ઉપચાર આરોગ્ય માટે લાભદાયક છે, પરંતુ HPV વાયરસ સામે 100% રક્ષણ માત્ર રસી જ આપે છે. કોઈપણ વિકલ્પિક ઉપચાર વાયરસ સામે સંપૂર્ણ સુરક્ષા આપી શકતો નથી.

વંધ્યત્વ અંગે માન્યતા
સમાજમાં એક ભ્રમ છે કે HPV રસી લેવાથી દીકરીઓમાં ભવિષ્યમાં માતૃત્વ પર અસર પડે છે અથવા વંધ્યત્વ આવે છે. હકીકતમાં, આ સંપૂર્ણપણે ખોટી માન્યતા છે.રસી પ્રજનન ક્ષમતા પર કોઈ નકારાત્મક અસર કરતી નથી, પરંતુ તે ગર્ભાશયનામુખના કેન્સરથી બચાવી દીકરીના ભવિષ્યને વધુ સુરક્ષિત બનાવે છે.

ઉંમર અંગેની સાચી માહિતી
૮ થી ૧૪ વર્ષની ઉંમર HPV રસી માટે ‘ગોલ્ડન ટાઇમ’ ગણાય છે. આ ઉંમરે શરીરમાં સૌથી વધુ રોગપ્રતિકારક( એન્ટિબોડીઝ) શક્તિ ઉત્પન્ન થાય છે, જે લાંબા ગાળે રક્ષણ આપે છે. તેથી નાની ઉંમરે જ રસી અપાવવી અત્યંત જરૂરી છે.

વારસાગત માન્યતા અંગે સ્પષ્ટતા
સમાજમાં એવી માન્યતા છે કે પરિવારમાં કેન્સરનો ઇતિહાસ ન હોય તો રસીની જરૂર નથી. હકીકતમાં, ગર્ભાશયના મુખનું કેન્સર વારસાગત નથી, પરંતુ HPV વાયરસના ચેપથી થાય છે. આ વાયરસનો ખતરો દરેક સ્ત્રી માટે સમાન છે. તેથી, પરિવારનો ઇતિહાસ ગમે તે હોય, દરેક દીકરી માટે રસી લેવી જરૂરી છે.

આડઅસર અંગેની ખોટી માન્યતા
સોશિયલ મીડિયામાં રસીના આડઅસર અંગે ભ્રામક માહિતી ફેલાયેલી છે. કેટલાક વીડિયોમાં રસી બાદ બેહોશ થવા કે ગંભીર બીમારીના દાવા કરવામાં આવે છે.પરંતુ હકીકતમાં, HPV રસી સંપૂર્ણપણે સુરક્ષિત છે. સામાન્ય રીતે ઈન્જેક્શનની જગ્યાએ થોડો દુખાવો અથવા હળવો તાવ આવી શકે છે, જે એક-બે દિવસમાં મટી જાય છે. વિશ્વભરમાં 10 કરોડથી વધુ દીકરીઓએ આ રસી સુરક્ષિત રીતે લીધી છે. તેથી અફવાઓથી દૂર રહી અને માન્યતાઓ છોડી દીકરીના ભવિષ્ય માટે આજથી જ પગલું ભરો. દીકરીને HPV રસી આપવી એ માત્ર પસંદગી નહીં, પરંતુ વાલીની જવાબદારી છે.