ગાંધીનગર જિલ્લામાં સ્થાનિક સ્વરાજની ચૂંટણી અન્વયે મતદાન મથકોની ૧૦૦ મીટરની ત્રિજ્યામાં પ્રતિબંધાત્મક આદેશો જાહેર
રાજ્ય ચૂંટણી આયોગ દ્વારા ગાંધીનગર જિલ્લાની ૨ નગરપાલિકાઓ (કલોલ, દહેગામ), જિલ્લા પંચાયત અને ૩ તાલુકા પંચાયતો (કલોલ, માણસા, દહેગામ) ની સામાન્ય તથા પેટા ચૂંટણીઓ જાહેર કરવામાં આવી છે. આ ચૂંટણી પ્રક્રિયા શાંતિપૂર્ણ અને ભયમુક્ત વાતાવરણમાં સંપન્ન થાય તેમજ કાયદો અને વ્યવસ્થા જળવાઈ રહે તે હેતુથી ગાંધીનગર જિલ્લા મેજીસ્ટ્રેટ શ્રી રવિન્દ્ર ખતાલે દ્વારા ભારતીય નાગરિક સુરક્ષા સંહિતા, ૨૦૨૩ ની કલમ-૧૬૩ હેઠળ પ્રતિબંધાત્મક હુકમો જારી કરવામાં આવ્યા છે.
આ હુકમ મુજબ, તા. ૨૬/૦૪/૨૦૨૬ ના રોજ મતદાનના દિવસે મતદાન મથકની અંદર તથા તેની ૧૦૦ મીટરની ત્રિજ્યામાં કોઈપણ વ્યક્તિએ મત માટે પ્રચાર કરવો નહીં, મતદારોને ડરાવવા-ધમકાવવા નહીં કે કોઈ ચોક્કસ ઉમેદવારને મત આપવા કે ન આપવા અંગે દબાણ કરવું નહીં. વધુમાં, મતદાન મથકમાં સેલ્યુલર/મોબાઈલ ફોન, કોડલેસ ફોન, પેજર અથવા વાયરલેસ સેટ જેવા વિજાણું સંદેશા વ્યવહારના સાધનો લઈ જવા પર તેમજ વાહનો સાથે આવવા પર સંપૂર્ણ પ્રતિબંધ ફરમાવવામાં આવ્યો છે. મતદાન મથકમાં માત્ર મતદાર, ઉમેદવાર અને ચૂંટણી પંચ દ્વારા અધિકૃત વ્યક્તિ જ પ્રવેશ કરી શકશે.
ચૂંટણી ફરજ પરના અધિકારીઓ, પોલીસ કર્મચારીઓ અને ચૂંટણી પંચના નિરીક્ષકોને ફરજ દરમિયાન જરૂરી સાધનો વાપરવામાંથી મુક્તિ આપવામાં આવી છે. આ હુકમનો ભંગ કરનાર સામે કડક શિક્ષાત્મક કાર્યવાહી કરવામાં આવશે, જે માટે હેડ કોન્સ્ટેબલ કે તેથી ઉચ્ચ હોદ્દો ધરાવતા પોલીસ અધિકારીઓને ફરિયાદ માંડવા અધિકૃત કરાયા છે.
