લોકશાહીના મહાપર્વમાં મતદાનની પવિત્ર ફરજ અદા કરવા ગાંધીનગર કલેક્ટર શ્રી રવિન્દ્ર ખતાલેનો નાગરિકોને અનુરોધ
લોકશાહીના મહાપર્વમાં પ્રત્યેક નાગરિકની સહભાગીદારી સુનિશ્ચિત કરવાના હેતુથી ગાંધીનગર જિલ્લા કલેક્ટર શ્રી રવિન્દ્ર ખતાલે દ્વારા મતદારોને ખાસ અપીલ કરવામાં આવી છે. કલેક્ટરશ્રીએ જણાવ્યું હતું કે, મતદાન એ માત્ર અધિકાર નથી પરંતુ રાષ્ટ્ર પ્રત્યેની એક પવિત્ર ફરજ છે. દરેક નાગરિકે પોતાના એક મતના મૂલ્ય અને શક્તિને સમજીને લોકશાહીના આ પર્વમાં અચૂક મતદાન કરવું જોઈએ અને ચૂંટણી પ્રક્રિયાને સફળ બનાવવામાં પોતાનું યોગદાન આપવું જોઈએ.
વધુમાં, હાલની ઉનાળાની સિઝન અને ગરમીના પ્રકોપને ધ્યાનમાં રાખીને વહીવટી તંત્ર દ્વારા મતદારોની સુવિધા માટે ખાસ વ્યવસ્થાઓ કરવામાં આવી છે. કલેક્ટરશ્રીએ ખાતરી આપતા જણાવ્યું હતું કે, મતદાન મથકો પર મતદારોને ગરમીના કારણે કોઈ પણ પ્રકારની અગવડતા ન પડે તે માટે છાંયડા માટે શેડ, પીવાના ઠંડા પાણીની સુવિધા અને બેઠક વ્યવસ્થા સહિતનું સુચારુ આયોજન કરવામાં આવ્યું છે. તંત્ર દ્વારા તમામ મતદાન મથકો પર પૂરતી તકેદારી રાખવામાં આવી છે જેથી નાગરિકો ઉત્સાહપૂર્વક અને સરળતાથી પોતાનો મત આપી શકે. ગાંધીનગરના તમામ મતદારોને આ મહાપર્વમાં જોડાઈને લોકશાહીને વધુ મજબૂત બનાવવા તેમણે ભાવભર્યું આમંત્રણ પાઠવ્યું છે.
