૨૬ એપ્રિલે ગાંધીનગર જિલ્લાની સ્થાનિક સ્વરાજ્યની ચૂંટણીઓમાં મતદાન માટે કર્મચારીઓને ખાસ રજા આપવા કલેક્ટરનો હુકમ

રાજ્ય ચૂંટણી આયોગ દ્વારા ગાંધીનગર જિલ્લા પંચાયત, કલોલ, માણસા અને દહેગામ તાલુકા પંચાયતો તેમજ કલોલ અને દહેગામ નગરપાલિકાઓની સામાન્ય ચૂંટણી આગામી તા. ૨૬/૦૪/૨૦૨૬ ને રવિવારના રોજ યોજવાનું જાહેર કરવામાં આવ્યું છે. લોકશાહીના આ પર્વમાં કોઈ પણ મતદાર પોતાના મતાધિકારથી વંચિત ન રહે તે હેતુથી ગાંધીનગર જિલ્લા ચૂંટણી અધિકારી અને કલેક્ટર શ્રી રવિન્દ્ર ખતાલે દ્વારા ખાસ આદેશ જારી કરવામાં આવ્યો છે. સામાન્ય રીતે રવિવારે જાહેર રજા હોય છે, પરંતુ રાષ્ટ્રીયકૃત અને ખાનગી બેંકો, સહકારી બેંકો, ઔદ્યોગિક એકમો, ફેક્ટરીઓ, હોટલો, હોસ્પિટલો તથા રેલવે, ટેલિફોન અને પોલીસ જેવી આવશ્યક સેવાઓ આપતી કચેરીઓ રવિવારે પણ કાર્યરત હોય છે. આ સંસ્થાઓમાં કામ કરતા કર્મચારીઓ અને શ્રમિકો મતદાન કરી શકે તે માટે કલેક્ટરશ્રીએ વૈકલ્પિક વ્યવસ્થાના ભાગરૂપે હુકમ કર્યો છે કે, આવા કર્મચારીઓને મતદાન માટે વારાફરતી ૩-કલાકની ખાસ રજા આપવાની રહેશે અથવા જે સંસ્થાઓમાં અન્ય દિવસે સાપ્તાહિક રજા હોય તેમણે રવિવાર તા. ૨૬/૦૪/૨૦૨૬ ના રોજ રજા આપી તેની બદલીમાં અન્ય દિવસે કામકાજ ચાલુ રાખવાનું રહેશે. વધુમાં, જો કોઈ કર્મચારી ગાંધીનગર જિલ્લાના નોંધાયેલ મતદાર હોય પરંતુ અન્ય જિલ્લાની કચેરી કે એકમમાં ફરજ બજાવતા હોય, તો તેમને પણ આ આદેશ મુજબ મતદાનની સવલત આપવાની રહેશે. નોંધનીય છે કે જે બેઠકો બિનહરીફ જાહેર થઈ હોય ત્યાં આ આદેશ લાગુ પડશે નહીં. તમામ ખાનગી અને સરકારી સંસ્થાઓએ આ આદેશનું ચુસ્તપણે પાલન કરી નૈતિક મતદાનમાં સહયોગ આપવા જિલ્લા ચૂંટણી અધિકારી દ્વારા જણાવાયું છે.