ધોરણ-૧૦ના પરિણામમાં ગાંધીનગર જિલ્લાનો દબદબો: ૮૮.૭૯% પરિણામ સાથે રાજ્યમાં અગ્રેસર

ગાંધીનગર તા.૦૬ મે-
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા લેવાયેલી ફેબ્રુઆરી-માર્ચ ૨૦૨૬ની ધોરણ-૧૦ (SSC) ની પરીક્ષાનું પરિણામ જાહેર કરવામાં આવ્યું છે. જેમાં ગાંધીનગર જિલ્લાએ ૮૮.૭૯% પરિણામ મેળવીને ઉત્કૃષ્ટ દેખાવ કર્યો છે. ગત વર્ષ ૨૦૨૫માં જિલ્લાનું પરિણામ ૮૭.૪૪% હતું, જેની સરખામણીએ આ વર્ષે પરિણામમાં ૧.૩૫% નો નોંધપાત્ર સુધારો જોવા મળ્યો છે. ગાંધીનગર જિલ્લાના કુલ ૨૨,૩૦૧ પરીક્ષાર્થીઓએ ધો.૧૦ની પરીક્ષા આપી હતી જેમાંથી ૧૯,૮૦૨ વિદ્યાર્થીઓ ઉત્તીર્ણ (પાસ) થયા છે. જિલ્લાની સરેરાશ ટકાવારી ૮૮.૭૯% છે.
ગાંધીનગર જિલ્લાના વિદ્યાર્થીઓએ ગુણવત્તાની દૃષ્ટિએ પણ શ્રેષ્ઠ પ્રદર્શન કર્યું છે. જિલ્લાના ૧,૦૨૪ વિદ્યાર્થીઓએ A1 ગ્રેડ, ૨,૯૫૭ વિદ્યાર્થીઓએ A2 ગ્રેડ, ૪,૦૫૦ વિદ્યાર્થીઓએ B1 ગ્રેડ, ૪,૬૮૯ વિદ્યાર્થીઓ B2 ગ્રેડ તથા ૪,૨૯૧ વિદ્યાર્થીઓએ C1 ગ્રેડ, ૨૪૮૨ વિદ્યાર્થીઓએ C2 ગ્રેડ પ્રાપ્ત કર્યા છે. રાજ્ય સ્તરે વિવિધ પરીક્ષા કેન્દ્રોમાં ગાંધીનગર જિલ્લાનું અજોલ કેન્દ્ર ૧૦૦% પરિણામ સાથે અવ્વલ રહ્યું છે. આ ઉપરાંત અન્ય કેન્દ્રોમાં પણ શાનદાર પરિણામ જોવા મળ્યું છે જેમાં જામલા કેન્દ્રનું ૯૮.૬૨%, બહિયલ કેન્દ્રનું ૯૭.૦૮%, ચરાડા કેન્દ્રનું ૯૫.૫૮%, લીંબોદરા કેન્દ્રનું ૯૪.૩૫% તથા ગાંધીનગર શહેર કેન્દ્રનું ૯૦.૪૬% પરિણામ જોવા મળ્યું છે. જિલ્લાના કુલ ૩૪ જેટલા પરીક્ષા કેન્દ્રો પૈકી મોટાભાગના કેન્દ્રોએ ૮૦% થી વધુ પરિણામ મેળવ્યું છે. નાંદોલ કેન્દ્રના પરિણામમાં ગત વર્ષની સાપેક્ષે ૨૦.૩૫% નો મોટો ઉછાળો જોવા મળ્યો છે. આ યશસ્વી સફળતા બદલ જિલ્લા શિક્ષણ તંત્ર અને વિદ્યાર્થીઓને અભિનંદન પાઠવવામાં આવ્યા છે.