ગાંધીનગર જિલ્લા કલેકટર રવિન્દ્ર ખતાલેની અધ્યક્ષતામાં ‘જિલ્લા સ્વાગત કાર્યક્રમ’ યોજાયો

ગુજરાત સરકારના પ્રજાભિમુખ અભિગમને કેન્દ્રમાં રાખીને ગાંધીનગર જિલ્લા કલેક્ટર શ્રી રવિન્દ્ર ખતાલેની અધ્યક્ષતામાં મે માસનો ‘જિલ્લા સ્વાગત કાર્યક્રમ’ યોજાયો હતો. આ કાર્યક્રમ‌‌ અંતર્ગત નાગરિકોના પડતર પ્રશ્નો અને રજૂઆતોનો ઝડપી તેમજ સંતોષકારક નિકાલ લાવવા માટે અરજદારોની રજૂઆતો રૂબરૂ સાંભળવામાં આવી હતી.

જિલ્લા સ્વાગત ફોરમ અંતર્ગત સંબંધિત વિભાગના જવાબદાર અધિકારીઓની ઉપસ્થિતિમાં અરજદારોના પ્રશ્નો રજૂ કરવામાં આવ્યા હતા, જ્યાં સ્થળ પર જ યોગ્ય માર્ગદર્શન અને જરૂરી સૂચનાઓ આપવામાં આવી હતી. જિલ્લા સ્વાગત ફોરમ કાર્યક્રમ દરમિયાન જિલ્લાના નાગરિકો દ્વારા રજૂ કરવામાં આવેલા જમીન સંપાદન, ગેરકાયદે બાંધકામ તેમજ સ્થાનિક માળખાકીય સુવિધાઓ જેવી કે રોડ, ગટર અને પાણીની વ્યવસ્થાને લગતા કુલ ૧૮ વિવિધ પ્રશ્નોની વિસ્તૃત સમીક્ષા કરવામાં આવી હતી. આ ૧૮ પ્રશ્નો પૈકી ૧૬ અરજીઓનો સ્થળ પર જ હકારાત્મક નિકાલ કરવામાં આવ્યો હતો, જ્યારે બાકી રહેલી બે પેન્ડિંગ અરજીઓ અંગે નિયમોનુસાર યોગ્ય કાર્યવાહી હાથ ધરવા આદેશ કરાયા છે.
કલેક્ટર શ્રી રવિન્દ્ર ખતાલેએ તમામ અરજદારોની રજૂઆતોને શાંતિપૂર્વક સાંભળીને વહીવટી તંત્રને સ્પષ્ટ સૂચનાઓ આપી હતી કે, પ્રજાના પ્રશ્નોનું યોગ્ય અને સમયબદ્ધ નિવારણ લાવવું એ પ્રાથમિકતા હોવી જોઈએ. આ સાથે જ સરકારી યોજનાઓનો લાભ છેવાડાના માનવી સુધી અત્યંત પારદર્શક રીતે પહોંચે તે માટે સમગ્ર વહીવટી તંત્રને સક્રિયતાથી કામ કરવા તેમણે અનુરોધ કર્યો હતો.